Kókshetaýda qalanyń 194 jyldyǵy keń kólemde toılandy
KÓKShETAÝ. QazAqparat-Kókshetaý qalasynyń 194 jyldyǵyn toılaý aıshyqty sharalarmen erekshelendi, dep habarlaıdy QazAqparat tilshisi.
Merekelik shara Aqmola oblysynyń əkimi Məlik Myrzalınniń Kókshetaý qalasyndaǵy birqatar əleýmettik nysandardy aralaýdan bastaldy.
Aımaq basshysy aldymen M.Jumabaev atyndaǵy Aqmola oblystyq ámbebap ǵylymı kitaphanasynda bolyp, kovorkıng ortalyǵynyń jumysyna nazar aýdardy. Ortalyqta kelýshilerdiń kitap oqyp qana qoımaı, demalystaryn jaıly ótkizýine qolaıly jaǵdaı jasalǵan.
Sondaı-aq munda Wi-Fi ornatylyp, qajetti tehnıkamen jabdyqtalǵan. Mmunda «Mobıldi kitaphana» ınteraktıvti oqý zaly jumys isteıdi. Al «Rýhanı qazyna» jobasy aıasynda 94 áleýmettik-mádenı jáne ınfraqurylymdyq kishi joba qolǵa alynǵan. Odan bólek, aýyldyq kitaphanalardy jańǵyrtýǵa baǵyttalǵan «Aýyldyq kitaphana - bilim men parasat ordasy» jobasy men «Magjan.kz» tarıhı-ádebı portaly jumys isteıdi. Búginde bul kitaphananyń kitap qorynda 361 036 kitap bar. Onyń ishinde 122 215 kitap tsıfrlandyrylǵan.
Sonymen qatar, M.Myrzalın balalardyń tehnoparkinde bolyp, qatysýshylardyń ІT tehnologııalary jáne baǵdarlamalaý boıynsha jetistikterimen tanysty.
Al, «Dostar» mádenıet saraıynda uıymdastyrylǵan «Kókshetaý arqanyń kerbez sulý tiregi» atty saltanatty sharada shahar turǵyndary men qonaqtaryn qala kúnimen quttyqtady.
«Astananyń 20 jyldyǵymen tuspa-tus kelgen Kókshetaýdyń 194 jyldyǵynyń máni men mańyzy zor. Kókshetaý - erekshe ásem tabıǵaty, baı tarıhy, rýhanı mádenıetimen shýaq shashatyn shejireli qala. Qalany aldaǵy ýaqytta júzege asyrylatyn úlken jobalar kútip tur. Onyń ishinde keler jyly Rýhanı jańǵyrý saraıynyń qurylysy bastalady. Al, Ulttyq dombyra kúni dombyrǵa arnalǵan eskertkish ornatylady....Sondyqtan da bárińizdi qala kúnimen quttyqtaı otyryp, onyń odan ári ádemi bolýyna atsalysýǵa shaqyramyn», dedi oblys ákimi M.Myrzalın.
Shara aıasynda aımaq basshysy qalanyń áleýmettik-ekonomıkalyq damýyna eleýli úles qosqan bir top kóshetaýlyqtardy túrli nagradalar jáne oblys ákiminiń Alǵys hattarymen marapattady.
Qala kúninen arnalǵan shara tanymal ánshi Avraam Rýsso men otandyq estrada juldyzdary Lýına, «Ninety one» toby jáne jergilikti ánshilerdiń oryndaýyndaǵy keshkilik kontsertke ulasty.
