Kókshetaýda qalalyq aýrýhananyń laýazymdy tulǵalary alaıaqtyq jasady degen kúdikke ilindi
Kókshetaý qalalyq aýrýhanasynyń ujymy mekemeniń bas dárigeri Erlan Aıaǵanovtyń qyzmetinen bosatylýyna kelispeıtinin bildirdi.
«Bas dáriger, Densaýlyq saqtaý úzdigi E.S. Aıaǵanovtyń kelýimen bizdiń aýrýhana, onyń ishinde TsIZ aıaǵynan tik turyp, jańa kelbetke ıe boldy (kosmetıkalyq jóndeý júrgizildi), qundy kadrlar men tájirıbeli mamandar jumysqa ornalastyryldy, kórsetiletin kómek kólemi men tósekterdiń jańa beıinderi keńeıtildi»,-delingen aýrýhananyń medıtsına qyzmetkerleriniń úndeýinde. 40-qa jýyq tájirıbeli dáriger burynǵy basshysyn qaıtarmaǵan jaǵdaıda qyzmetinen bosatý týraly ótinish jazbaq.
Qalyptasqan jaǵdaıǵa Aqmola oblysy Densaýlyq saqtaý basqarmasynyń basshysy Narıman Syzdyqov túsinikteme berdi.
«22 qazanda tártiptik komıssııanyń otyrysy ótip, sonyń sheshimine sáıkes bas dáriger Erlan Aıaǵanovpen eńbek qatynastaryn toqtatý usynyldy. Tártiptik komıssııanyń qorytyndysy usynymdyq sıpatta bolady, birinshi basshyǵa túpkilikti sóz beriledi. Osyǵan baılanysty 25 qazanda maǵan Erlan Serikuly tarapynan jumyskerdiń nıeti boıynsha onymen eńbek qatynastaryn toqtatý týraly ótinish kelip tústi. Ótinish qanaǵattandyryldy. Qazirgi ýaqytta Kókshetaý qalalyq aýrýhanasynyń bas dárigerimen eńbek qatynastary toqtatyldy», - dep túsindirdi N. Syzdyqov.
Bas dárigermen yntymaqtastyq belgisi retinde aýrýhanadan shyǵýǵa nıetti dárigerler tarapynan ujymdyq Úndeýge qatysty N.Syzdyqov olardyń barlyǵy zańnamada belgilengen merzimde jáne belgilengen tártippen ózi sheteldik issapardan oralǵannan keıin qaralatynyn túsindirdi.
«Kókshetaý qalalyq aýrýhanasynyń keıbir laýazymdy tulǵalaryna qatysty qazirgi ýaqytta sotqa deıingi tergeý is-sharalary júrgizilip jatqanyn qosymsha habarlaǵym keledi. Qoldanystaǵy zańnamaǵa sáıkes, QІJK 201-shi baby, QR QK 407-baby, tergeý barysy jáne onyń egjeı-tegjeıi týraly derekter jarııa etýge jatpaıdy», - dep tolyqtyrdy N. Syzdyqov.
Aqmola oblysy polıtsııa departamentiniń baspasóz qyzmetinde túsindirgendeı, polıtseılerdiń óndirisinde 2021 jylǵy 12 shildedegi QR QK 190-shy baby 2-bóliginiń 3-tarmaǵy (qyzmet babyn paıdalana otyryp alaıaqtyq jasaý) boıynsha «Kókshetaý qalalyq kópbeıindi aýrýhanasy» ShJQ MKK laýazymdy adamdaryna qatysty tirkelgen qylmystyq is bar.
«Sotqa deıingi tergeý materıaldaryna qatysty aqparat jarııa etilmeıdi, óıtkeni bul tergeý múddelerine qaıshy keledi jáne basqa adamdardyń quqyqtary men múddelerin buzýy múmkin», - dep tolyqtyrdy departamenttiń baspasóz qyzmetinen.
Ázirge medıtsınalyq mekemeniń bas dárigeriniń mindetin orynbasary atqarýda.