Kókshetaýda «Q.Sátbaev - HH ǵasyrdyń ǵulama ǵalymy» atty ǵylymı semınar ótti (FOTO)
KÓKShETAÝ. QazAqparat - Kókshetaýda oblystyq «Qazaq tili jáne mádenıeti» qoǵamynyń uıymdastyrýymen «Q.Sátbaev - HH ǵasyrdyń ǵulama ǵalymy» atty ǵylymı-praktıkalyq semınar ótti.
A.Myrzahmetov atyndaǵy Kókshetaý ýnıversıteti men Soltústik Qazaqstan óńiraralyq geologııa jáne jer qoınaýyn paıdalaný departamentiniń atsalysýymen ótken sharaǵa ǵalymdar men joǵary oqý oryndarynyń stýdentteri, mektep oqýshylary qatysty.
Ǵylymı-praktıkalyq semınardy ashqan oblystyq «Qazaq tili jáne mádenıeti» qoǵamynyń tóraǵasy Meırambek Qıyqov bundaı sharany ótkizýdegi basty maqsat - Jezqazǵan óńirindegi kóptegen jer asty baılyqtarynyń kózin ashyp, elimizdiń ǵylymynyń damýyna zor úles qosqan zańǵar tulǵamyzdyń ómir, eńbek jolyn jas urpaqqa tanystyrý, sol arqyly olardyń boıynda otansúıgishtik, eljandylyq, ınternatsıonaldyq tárbıeni sińirý ekendigin atap ótti.
Semınarda ǵalymnyń bala kezinen bastap erjetip eseıgendegi, ǵylym jolyna túsip, bıikterge kóterilgen kezeńderi týraly jan-jaqty aqparattar berildi. №18 Kókshetaý orta mektebiniń oqýshylary Nurlan Orazbaev pen Aıda Ámirhanova bala Qanyshtyń ómiri jaıynda áńgimelep berdi. Bala kezinen oqýǵa zerek bolǵan ol ózge balalar sııaqty qaltasyna asyq salyp oınamaı, kerisinshe ózen jaǵasynda jatqan tastardy jınaıdy. Ákesi Imantaı alǵyr uldyń bolashaǵynan úlken úmit kútip, aýyl mektebin bitirgen soń Pavlodar qalasyndaǵy orys-qazaq ýchılışesine oqýǵa jiberedi. Densaýlyǵynyń nasharlaýyna qaramastan, bilimge qushtar bozbala oqýyn oıdaǵydaı bitirip shyǵady.
A.Myrzahmetov atyndaǵy Kókshetaý ýnıversıtetiniń stýdenti Maǵypar Atyǵaı ǵalymnyń Tomsk tehnologııa ınstıtýtyna túsip, oqyǵan kezeńi jaıynda aıtyp berse, osy ýnıversıtettiń oqytýshysy tehnıka ǵylymdarynyń kandıdaty Nurjan Bolatov pen Rızat Elýbaev Qanysh Sátbaevtyń ǵylym salasyndaǵy eńbekteri men qoǵam qaıratkeri retindegi jumystary jaıynda jan-jaqty baıandady.
Shara barysynda ǵalymdar men stýdentterdi «Qazaq tili men mádenıeti» qoǵamynyń tórǵasy M.Qıyqov pen oblystyq jastar isi saıasaty basqarmasynyń basshysy R.Ǵallıamov alǵys hattarmen marapattady. Semınar sońynda oǵan qatysýshylar Q.Sátbaev kóshesiniń boıyndaǵy ǵalymnyń eskertkish bıýstine gúl shoqtaryn qoıdy.
