Kókshetaýda isker áıelder Elbasy Joldaýyn talqylady
KÓKShETAÝ. QazAqparat - Kókshetaýda isker áıelder Konstıtýtsııalyq reformalar men QR Prezıdentiniń Joldaýyn talqylady, dep habarlaıdy «QazAqparat» HAA tilshisi oblystyq ishki saıasat basqarmasynyń baspasóz qyzmetine silteme jasap.
Forým óńirdegi isker áıelderdiń pikir almasý alańy bolyp tabylady. Sharaǵa óńirdegi bıznes qurylymdar, bank júıesiniń qyzmetkerleri, jastar men memlekettik emes uıymdardyń ókilderi, memlekettik organdardyń qyzmetkerleri qatysty. Forýmaǵa qatysýshylar QR Prezıdenti Nursultan Nazarbaevtyń Konstıtýtsııalyq reformalary men Joldaýda týyndaǵan mindetterdi talqylap, óz oılarymen bólisti.
«Halyqaralyq tájirıbe kórsetkendeı, tabysty memleketterdiń qatarynda bolýǵa umtylyp jatqan eldiń ilgerileýin qamtamasyz etetin memlekettik bılik tarmaqtarynyń ózara is-áreketiniń júıesin qurýǵa zor mańyz beriledi. Bıliktiń tarmaqtary arasynda ókilettikterdi qaıta bólý máselesi memlekettiń odan ári damýyna on yqpal etpek», dedi Aına Mysyrálimova óz sózinde.
Kásipkerlik salasynda kórsetilip jatqan memlekettik qoldaý sharalary týraly Aqmola oblysy kásipkerleriniń palatasy dırektorynyń orynbasary Fatıma Gerfanova aıtyp berdi. Al, «Aqmola oblysynyń azamattyq alıansy» zańdy tulǵalar qoǵamynyń tóraıymy Irına Terenteva óńirdiń áleýmettik-ekonomıkalyq damýynda memlekettik emes uıymdardyń róli týraly áńgime qozǵady.
Ásirese, kásipkerlerge memlekettik baǵdarlama arqyly nesıe alýdyń joldaryn túsindirgen «Sberbank» AQ-nyń Aqmola oblystyq fılıalynyń dırektory Ásel Mahmýdovanyń baıandamasy forýmǵa qatysýshylardyń qyzyǵýshylyǵyn arttyrdy.
Forýmdy qorytyndylaǵan isker áıelder bir aýyzdan Elbasynyń Qazaqstan halqyna arnaǵan Joldaýy men Konstıtýtsııalyq reformalardyń mańyzyn atap ótti.
