Kókshetaýda iri kólemde marıhýana saqtaǵan 29 jastaǵy qala turǵyny ustaldy
KÓKShETAÝ. QazAqparat - Kókshetaýda 3 keliden astam marıhýana saqtaǵan 29 jastaǵy qala turǵyny ustaldy, dep habarlaıdy "QazAqparat" HAA tilshisi oblystyq ІІD baspasóz qyzmetine silteme jasap.
Polıtseılerdiń málimeti boıynsha aǵymdaǵy jyldyń 19-shy jeltoqsanynda ІІD jəne ІІB esirtki saýdasymen kúresý jónindegi bólimsheniń qyzmetkerleri oblys ortalyǵyndaǵy "Qopa" kóliniń jaǵasynda 29 jastaǵy qala turǵynyn ustaǵan.
Tekseris barysynda odan qaǵaz qorapqa salynǵan surǵylt-jasyl tústes zat tərkilendi. Sot-medıtsınalyq saraptama qorytyndysyna saı tárkilengen zat salmaǵy 3 keli 657 gramm "keptirilgen marıhýana" ekeni anyqtaldy.
Kúdiktiniń sózine qaraǵanda, esirtki zatyn ózi qoldaný úshin saqtaǵan. Alaıda, polıtseıler onyń esirtki qoldanýshy retinde narkologııada esepte joqtyǵyn jəne ata-anasymen birge turatynyn anyqtap otyr. Sonymen qatar, kúdiktiniń oblys aýmaǵynda esirtki saýdasyna qatysty bar-joǵy anyqtalýda.
"Qazirgi kezde, kúdikti ýaqytsha ustaý oqshaýlaǵyshyna toǵytylyp, ústinen QR QK 296-babynyń 4-bólimi boıynsha sotqa deıingi qylmystyq is qozǵaldy", deıdi polıtseıler.
Polıtseılerdiń deregi boıynsha jyl basynan beri oblys aýmaǵynda zańsyz esirtki saýdasymen aınalysýǵa qatysty 142 qylmystyń beti ashyldy. Oǵan qosa, 6 narkoprıton anyqtalyp, esirtkige masaıǵan 297 júrgizýshi ustaldy. Zańsyz saýda aınalymynda júrgen 685 keli túrli esirtki zattary tərkilendi.
