Kókshetaýda ınsýlttiń aldyn alatyn kúrdeli operatsııa tegin jasalady
ASTANA. QazAqparat - Insýltpen aýyratyn aqmolalyq naýqastar endi oblystyq aýrýhanada tegin operatsııa jasata alady, dep habarlaıdy 24.kz telearnasy.
Bul operatsııanyń quny 4 mln teńgeden asatyn. Insýlttiń aldyn alýǵa múmkindik beretin mundaı kúrdeli em-dom sharalary buryn tek Astana men Almaty qalalarynda ǵana júrgiziletin. Al aımaq dárigerleri elordadaǵy Ulttyq neırohırýrgııa ortalyǵy ókilderimen tájirıbe almasý arqyly osyndaı jetistikke qol jetkizip otyr.
Mamandardyń aıtýynsha, budan bylaı neırohırýrgtar endovaskýlıarlyq ádispen adamnyń bassúıegin burynǵydaı ashpaıdy. Ári teri de zaqymdalmaıdy. Óıtkeni operatsııa pyshaqsyz jasalady.
«- Mı qantamyrlaryna operatsııa jasaý úshin bizge endi bir kishkene tesik qana jetkilikti. Sol arqyly arnaıy quraldarymyzdy engizip, basta paıda bolǵan arterıaldy anevrızmdi jabamyz. Operatsııadan keıingi beıimdelý kezeńi de tez ótedi. Bul - damyǵan elderdiń tájirıbesi», deıdi oblystyq aýrýhananyń neırohırýrgııa bólimshesniń meńgerýshisi Erlan Aıaǵanov.
