Kókshetaýda III-shi aımaqtyq teatrlar festıvaliniń ashylýy ótti

KÓKShETAÝ. QazAqparat – QR Táýelsizdiginiń 30 jyldyǵy jáne Shahmet Qusaıynov atyndaǵy Aqmola oblystyq qazaq mýzykalyq - drama tearynyń 25 jyldyǵyna oraı Kókshetaý qalasynda III-shi aımaqtyq teatrlar festıvali shymyldyǵyn kóterdi. Festıvalge Qaraǵandy, Qostanaı, Pavlodar, Petropavl qalalaryndaǵy oblystyq qazaq teatrlary keldi, dep habarlaıdy QazAqparat tilshisi.

Bıylǵy jylǵy qyrkúıektiń 17-20 kúnderi aralyǵynda ótetin festıvaldiń ashylýyna arnalǵan saltanatty shara Shahmet Qusaıynov atyndaǵy Aqmola oblystyq qazaq mýzykalyq - drama tearynda ótti.

Sharada Aqmola oblysy ákiminiń orynbasary Aına Mysyrálimova quttyqtaý sóz sóıledi.

«Búgin Aqmola óńirinde kıeli Kókshetaý jerinde úlken toı. Sebebi bıyl QR Táýelsizdigine 30 jyl jáne oblys rýhanııatynyń qara shańyraǵy sanalatyn Shahmet Qusaıynov atyndaǵy Aqmola oblystyq qazaq mýzykalyq - drama teatrǵa 25 jyl tolyp otyr. Bul teatr shırek ǵasyr ishinde túrli belesterdi baǵyndyryp qana qoımaı, elimizdiń mádenıetiniń damýy jolynda aıanbaı ter tógip kele jatqan biregeı óner ordalarynyń birine aınaldy», - dedi Aına Mysyrálimova.

Aıta ketsek, eń alǵash 1996 jyly jazýshy - dramatýrg Ǵabıt Músirepovtyń «Aqan seri Aqtoqty» dramasymen shymyldyǵyn ashqan teatr jyl sanap qanatyn keńge jaıyp damyp keledi. Teatr - búginge deıin álem jáne qazaq klassıkteriniń 200-ge jýyq qoıylymyn kórermen nazaryna usynyp úlgerdi. Olardyń ishindegi klassıkalyq qoıylymdardan Ý.Shekspır «Korol Lır», Sh.Aıtmatov «Ǵasyrdan da uzaq kún», S.Júnisov «Abylaı», A.Kamıý «Kalıgýla», dramalyq qoıylymdardan Á.Orazbekov «Bir túp alma aǵashy», O.Bókeı «Ataý kere», komedııalyq qoıylymdardan O.Bodyqov «Úılengim kelmeıdi», S.Ahmad «Kelinder kóterilisi», B.Álimjanov «Qudalyq» spektaklderin atap ótýge bolady.

Qazaq teatry jyl saıyn ónerli jastarmen tolysyp kemeldenýde. Keshegi balaýsa teatrdyń ashylýyna at salysqan qyz - jigitter búgingi tańda elimizge tanymal óner ıelerine aınalyp otyr.

Festıvaldiń ashylýyna oraı, Shahmet Qusaıynov atyndaǵy Aqmola oblystyq qazaq mýzykalyq - drama tearynda baıqaýdan tys «P.S.Men seni saǵyndym» qoıylymy sahnalandy.

Festıvalge qatysýshy teatrlar úsh kún boıy aqmolalyq kórermenderdi óz ónerlerimen sýsyndatatyn bolady.