Kókshetaýda gaz ballonynyń jarylýynan saqtaıtyn klapan qurastyrylyp shyǵaryldy
KÓKShETAÝ. QazAqparat - Aqmola oblysynda joǵary qysym kezinde gaz ballondarynyń jarylysyn boldyrmaıtyn, joǵary qaýipsizdikti qamtamasyz etetin rettegish tıek armatýra qurastyrylyp shyǵaryldy, dep habarlaıdy QazAqparat tilshisi oblystyq kásipkerlik jáne ónerkásip basqarmasyna silteme jasap.
Kókshetaýdaǵy «Tynys» AQ qurastyrylǵan rettegish tıek armatýra artyq qysym jınalǵan kezde gaz ballonynyń búlinýine jáne jarylýyna jol bermeıdi. Sondaı-aq, tótenshe jaǵdaılar kezinde adamdardyń ómiri men densaýlyǵyn saqtap, múlkine zalal kelmeýin qamtamasyz etedi.
«QR ІІM 2017 jyldyń 9 qazanyndaǵy № 673 «gazben jabdyqtaý júıesinde qaýipsizdikti talap etý týraly» buıryǵyna sáıkes gaz ballondary joǵary qysym kezinde gazdy syrtqa shyǵarý klapandarymen jabdyqtalýy kerek bolatyn.
«Tynys» kásipornynyń ókilderi gaz ballony qyzyp nemese qysymy artqan kezde ishtegi gazdy syrtqa shyǵaratyn arnaıy klapandy qurastyryp shyǵardy. Joǵary qaýipsizdikti qamtamasyz etetin rettegish tıek armatýrasy bar mundaı ballondardy 5 qabattan aspaıtyn turǵyn úılerde qoldanýǵa bolady», dep túsindirdi Aqmola oblystyq kásipkerlik jáne ónerkásip basqarmasyndaǵylar.
Bul klapandar arnaıy polıgondarda synaqtan ótkizilip, zertteldi. Tısti zerthanalyq sheshim men sertıfıkat ta bar. «Tynys» AQ osyndaı KB-2P klapandaryn, sondaı-aq, VB-2P ballon shyǵarýǵa tolyq ázir. Kásiporynnyń óndiristik qýaty Qazaqstanyń barlyq óńirin osyndaı ónimdermen qamtamasyz etýge múmkindigi jetedi.
