Kókshetaýda feldsherdi balaǵattaǵandar 10 táýlikke deıin qamaýǵa alyndy
ASTANA. KAZINFORM – Kókshetaý qalalyq emhanasynyń feldsheri naýqastyń úıine barǵanda balaǵat sózderge, qorqytýǵa jáne kúsh kórsetý áreketine tap bolǵan. Oqıǵaǵa kináliler bes táýlikten 10 táýlikke deıin ákimshilik qamaýǵa alyndy.
Qalalyq emhananyń zańgeri Arman Dútbaevtyń aıtýynsha, oqıǵa Kókshetaýda 21 shilde kúni saǵat 13:50 shamasynda bolǵan. Sol kezde medıtsınalyq mekeme feldsheri 55 jastaǵy er adamnyń úıine shaqyrtý boıynsha barǵan.
– Er adam mas kúıde bolǵan jáne feldsherdiń naýqasty qaraýyna kedergi keltirgen. Ol feldsherdi balaǵattap, jaǵasyna jarmasyp, páterden shyǵaryp jibermek bolǵan. Feldsher ketýdi uıǵarǵan. Alaıda sol jerde 1986 jylǵy eki áıel, kerisinshe, er adamdy qarap shyǵýy úshin feldsherdi toqtatýǵa tyrysqan. Olar da medıtsına qyzmetkerin bylapyt sózdermen balaǵattap, shyǵatyn jolyn bógegen. Sol kezde feldsher olardyń áreketin telefonǵa túsire bastaǵan. Óıtkeni biz medıtsına qyzmetkerlerine agressıvti áreketke tap bolǵan jaǵdaıda mindetti túrde vıdeoǵa túsirý keregin túsindirgenbiz. Qazir emhana beınetirkegishter satyp aldy, beınejazba júrgizilip jatyr, – dedi zańger.
Agressıvti áreketti toqtatý úshin medıtsına qyzmetkeri polıtsııa shaqyrǵan. Polıtseıler QR Ákimshilik quqyq buzýshylyq týraly kodeksiniń 80-1-babynyń 2-bóligi – «Qyzmettik mindetin atqarý kezinde medıtsına jáne farmatsevtıka qyzmetkerlerine qurmetsizdik tanytý» boıynsha materıal jınaǵan.
Іs Kókshetaý qalasynyń ákimshilik sotyna joldandy. Nátıjesinde negizgi quqyq buzýshy 10 táýlikke, áıelderdiń biri 7 táýlikke, ekinshisi 5 táýlikke ákimshilik qamaýǵa alyndy.
Zańgerdiń aıtýynsha, medıtsına qyzmetkerin balaǵattaý máselesi jeke tártippen sheshilýi múmkin. Al ázirge quqyq buzýshylar ákimshilik qamaýda otyr.
Aıta keteıik, byltyr kúzde elordadaǵy turǵyn úıde kirpish qaptamasy qulap, mert bolǵan feldsher Uldana Myrzýanǵa qatysty is Astana sotynda qaralyp jatyr.
