Kókshetaýda «Ejelgi Taraz eskertkishteri» atty kórme ótip jatyr
KÓKShETAÝ. QazAqparat - Aqmola oblysynyń tarıhı-ólketaný murjaıynda «Ejelgi Taraz eskertkishteri» tarıhı-mádenı memlekettik qoryq-murajaıynyń arheologııalyq jyljymaly kórmesi ótýde, dep habarlaıdy QazAqparat tilshisi.
Kórmeniń ashylýyna Aqmola oblysy mádenıet basqarmasy basshysynyń mindetin atqarýshy Gúlmıra Beknazarova, Sh.Ýálıhanov atyndaǵy Kókshetaý memlekettik ýnıversıtetiniń áleýmettik jáne tárbıe jónindegi prorektory Amanaı Seıitqasymov, «Ejelgi Taraz eskertkishteri» tarıhı-mádenı memlekettik qoryq-murajaıy dırektorynyń ǵylym jónindegi orynbasary Qýanysh Dáýrenbekov jáne jastar qatysty.
Jambyl oblysynyń aýmaǵynda 3 365 tarıhı jáne mádenı eskertkish ornalasqan. Onyń 260-qa jýyǵy Aqmola oblysynyń tarıhı-ólketaný murjaıynda ótip jatqan kórmege qoıylǵan.
Aıta keteıik, «Ejelgi Taraz eskertkishteri» tarıhı-mádenı memlekettik qoryq-murajaıy ashylǵan kezde 100-den astam tarıhı jáne mádenı eskertkish tirkelse, onyń 30-y respýblıkalyq deńgeıdegi, orta ǵasyrlardaǵy 5 qala ıÝNESKO dúnıejúzilik mádenı mura tizimine alynǵan. Kórmege qoıylǵan jádigerlerdiń arasynda Túrgeshter zamanynda soǵylǵan kúmis, qola teńgeler, Qarluq qaǵanaty dáýirinen jetken áshekeı buıymdar men turmystyq zattar, Qarahan dáýiri mádenıetinen syr shertetin áıeldiń altyn-kúmis áshekeı buıymdary, qoladan quıylǵan shyraǵdandar bar.
«Kókshetaý atalmysh kórme ótip jatqan tórtinshi qala. Osyǵan deıin kórme Astana, Qostanaı jáne Petropavl qalalarynda boldy. Kókshetaýlyqtar 2000 jyldyq tarıhy bar kóne Taraz qalasynan jetken orta ǵasyr jádigerlerin bir aı boıy tamashalaı alady», - deıdi Aqmola oblysynyń tarıhı-ólketaný murjaıynyń qyzmetkerleri.
