Kókshetaýda «Evro-5» talabyna saı avtobýstar synaqtan ótkizilýde
KÓKShETAÝ. QazAqparat-Kókshetaýda Reseıdiń «Rarı TEK JMZ» kompanııasynyń Lotos markaly avtobýstary qalaishilik marshrýttarda synaqtan ótkizile bastady, dep habarlaıdy QazAqparat tilshisi.
Búgin alǵashqy synaq avtobýsymen qala ákimi Ermek Myrjyqpaev, ákimdik qyzmetkerleri, qalalyq máslıhattyń depýtattary qala kósheleriniń boıymen júrip ótti. 
«Kókshetaý avtobýs parki» jaýapkershiligi shekteýli seriktestiginiń dırektory Ásııa Shárimovanyń aıtýynsha, atalmysh avtobýstar qaladaǵy №1, №10 jáne №16 baǵyttarda bir apta boıy jolaýshylarǵa qyzmet kórsetedi. Osy aralyqta jolaýshylar tegin tasymaldanatyn bolady. Bul joba qalalyq ákimdiktiń «Kókshetaý qalasynda jolaýshylar kóligin jańǵyrtý» jobasy sheńberinde qolǵa alynyp otyr. Atalmysh joba boıynsha qoldanystaǵy avtobýstardyń 40-50 paıyzyn, ıaǵnı, tozyǵy jetken kólikterdi aýystyrý qarastyrylǵan. 
Osyǵan deıin atalmysh avtobýstardyń tutynýshylyq paıdalaný merzimi jəne ekonomıkalyq múmkindikteri saralanyp, qoǵamdyq tyńdaýlar ótkizilgen edi. Endi búginnen bastap Kókshetaý qalasy boıynsha «Evro-5» talabyna saı úlken jəne shaǵyn avtobýstardyń alǵashqylary jolaýshylar tasymaldaýǵa kiristi.
Jańa kólikter beınebaqylaý, kondıtsıoner, symsyz ınternet jelisi jáne jylytý júıesimen jabdyqtalǵan. Sondaı-aq, múmkindigi shekteýli jandar úshin kótergish te bar.
Osy rette, qala ákimi avtobýstardyń eýroekologııalyq talaptarǵa saı ekenin aıta kele, keıbir kem-ketigin de kompanııa basshylaryna eskertip ótti.
«Naqty bir sheshim shyǵarmas buryn synaq merziminde mamandar bul avtobýstardy bastan-aıaq zerttep kóredi. Sonymen qatar, jolaýshylardyń pikirlerine de qulaq túretin bolamyz», - dedi qala ákimi.
Jalpy, synaq merzimi arqyly bul avtobýstardyń bizdiń qalaǵa jaraıtyn-jaramaıtyny anyqtalady. Sodan keıin ǵana dılerler men avtobýs qurastyrýshylar qalalyq ákimdiktiń sheshimimen naqty qadam jasaıtyn bolady.
