Kókshetaýda Eýrazııa ǵalymdary bas qosty
KÓKShETAÝ. QazAqparat - Shoqan Ýálıhanov atyndaǵy Kókshetaý memlekettik ýnıversıtetinde «Eýrazııalyq ıdeıa jáne postkeńestik keńistiktegi ıntegratsııalyq úrdister» halyqaralyq ǵylymı-tájirıbelik konferentsııasy ótkizildi, dep habarlaıdy QazAqparat tilshisi.
Sharaǵa qatysýshylar aldymen, joǵary oqý ornynyń murajaıyn, «Sh.Ýálıhanov atyndaǵy Kókshetaý memlekettik ýnıversıtetiniń jetistikteri» atty kórmeni tamashalap, Sh.Ýálıhanovtyń eskertkishine gúl shoqtaryn qoıdy.
Konferentsııaǵa ýnıversıtettiń rektory, tehnıka ǵylymdarynyń doktory, professor, Qazaqstannyń eńbek sińirgen qaıratkeri Ábdimútálip Ábjapparov, bilim ordasynyń oqytýshylary men stýdentteri jáne BAQ ókilderi qatysty.
Konferentsııanyń plenarlyq májilisinde taqyrypqa qatysty saıasattaný ǵylymdarynyń doktorlary, Reseı Federatsııasynyń Máskeý, Sankt-Peterbýrg memlekettik ýnıversıtetteriniń professoryAleksandr Shırınıants, Aleksandr Kýrochkın, Vladımır Gýtorov, Valerıı Achkasov, Konstantın Fedorovıch, Alekseı Nıkolaevıch, Shyńjań ýnıversıtetiniń doktoranty Nurbaqyt Kenjehan, Sh.Ýálıhanov atyndaǵy Kókshetaý memlekettik ýnıversıtetiniń tarıh, quqyq, óner jáne sport fakýltetiniń dekany, tarıh ǵylymdarynyń kandıdaty, professor Aqbota Bekseıitovanyń baıandamalary tyńdaldy.
Baıandama barysynda kóptegen taqyryptar qozǵalyp, utymdy oılar aıtyldy. Atap aıtqanda, Aqbota Bekseıitova «Eýrazııalyq dala ótkenıeti: teorııalyq-metodologııalyq jáne tarıhnamalyq sholý» taqyrybyn qozǵasa, A.Pýshkın atyndaǵy Lenıngrad memlekettik ýnıversıtetiniń professory, fızıka-matematıka ǵylymdarynyń doktory Alekseı Kadochnıkov «Eýrazııalyq keńistiktegi ekologııalyq saıasat azamattar men qoǵam múddeleriniń mańyzdy quramdas bóligi bolyp tabylady» taqyrybynda bolashaq urpaq úshin, bolashaq oqýshy, stýdentter úshin ekologııany saqtap qalýdyń múmkin joldaryn qarastyrý kerektigin sóz qyldy. Sondaı-aq, Qytaıdyń Shyńjań ýnıversıtetinen kelgen doktorant Nurbaqyt Kenjehannyń baıandamasy repatrıant, ıaǵnı oralman qazaqtardyń shet elde beıimdelý, ıntegratsııalaný úrdisindegi týyndaıtyn qıyndyqtary jaıly boldy.
Shara sońynda qatysýshylar ózara pikir almasty.
