Kókshetaýda esirtki jasalyp kelgen fıtozerthana joıyldy

KÓKShETAÝ. QazAqparat – Aqmola polıtseıleri esirtki óndirisine arnalǵan fıtozerthanany joıdy. Óńir aýmaǵynda zańsyz bıznesti Pavlodar oblysynyń úsh týmasy uıymdastyrǵan, dep habarlaıdy QazAqparat Polisia.kz saıtyna silteme jasap.

22 qyrkúıek kúni polıtsııa departamentiniń esirtki qylmysyna qarsy is-qımyl jáne krımınaldyq polıtsııa qurylymdarynyń birlesken arnaıy operatsııasy nátıjesinde kúdikti ustalyp, tintý kezinde odan 195,22 gramm marıhýana esirtki zaty bar 11 paket tabylǵan.

Tárkilengen esirtki zattarynyń kepilgeri de ustaldy. Tergeý sharalary aıasynda 20 jastaǵy azamattyń Pavlodar oblysy Aqsý qalasynyń turǵyny ekeni anyqtaldy.

Jedel ýákilder osy preparatty satyp alý arnasyn anyqtaǵan kezde, taǵy bir 21 jastaǵy pavlodarlyq ustaldy. Polıtsııa odan salmaǵy 145,52 gramm bolatyn uqsas zatty tapty.

Jedel izdestirý is-sharalary barysynda marıhýana Kókshetaý qalasynyń aýmaǵynda jasalǵany anyqtaldy.

Sol kúni jalǵa alynǵan jeke úıde jedel ýákilder úshinshi arnaıy operatsııa júrgizdi, sonyń nátıjesinde jerasty fıtolaboratorııasynyń uıymdastyrýshysy bolǵan Pavlodar qalasynyń turǵyny ustaldy.

Tintý kezinde polıtsııa qyzmetkerleri kannabıs ósimdiginiń (qarasora) 10 butasyn tárkiledi. Jalpy salmaǵy 1,32 kg jáne salmaǵy 2 kılogramǵa jýyq keptirilgen marıhýana salynǵan 2 paket tabyldy. Sondaı-aq, nysanda arnaıy jabdyqtar boldy: jaryq jáne dıodty shamdar, jeldetkishter, termometrler, ylǵaldylyqty ólsheý quraldary men qarasora tuqymy bar sómke. Sonymen qatar, esirtkini qoldanýǵa arnalǵan 3 qurylǵy tárkilendi.

Barlyq faktiler boıynsha sotqa deıingi tergeý bastaldy. Aıyptalýshylar qamaýǵa alyndy. Pavlodarlyqtardyń úsheýi de biraz ýaqyttan beri quramynda esirtki bar ósimdikterdi ósirýmen, Kókshetaý aýmaǵynda esirtkilerdi zańsyz saqtaýmen jáne ótkizýmen aınalysqany anyqtaldy.

Foto: polisia.kz