Kókshetaýda esirtki saqtaǵany úshin ustalǵan er adamnan qarý tabyldy
NUR-SULTAN. QazAqparat – Aqmola oblysynyń polıtseıleri esirtki saqtaǵany úshin ustalǵan er adamnan zańsyz qarýdy tárkiledi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
2019 jyldyń basynan beri Aqmola oblysynyń turǵyndary jalpy somasy 4 mıllıon teńgeden asatyn qarý jáne oq-dárilerdi óz erkimen tapsyrdy. «Quqyq tártibi» sharasy júrgizý barysynda polıtseıler Kókshetaýdyń esirtki saqtaǵany úshin ustalǵan turǵynynan zańsyz «Ij-26» markaly tegis uńǵyly myltyǵyn tárkiledi.
Er adamnyń aıtýynsha, oǵan myltyq marqum atasynan mura bop qalǵan.
Tárkilengen myltyq zaýytta jasalǵan, ishki ister bólimderinde tirkelmegen, qylmystyq esepte de joq bolyp shyqty.
«Myltyq zertteý úshin Kókshetaý qalasy polıtsııa bóliminiń jedel qylmystyq bólimine jiberildi. QR «Ákimshilik quqyq buzýshylyq týraly» kodeksiniń 482-babyna («Jeke jáne zańdy tulǵalardyń qarýdy zańsyz ıelenip alýy, berýi, ótkizýi, saqtaýy, alyp júrýi, tasymaldaýy») sáıkes ákimshilik materıaly toltyryldy», - dep málimdedi PD baspasóz qyzmeti.
Polıtseıler zańsyz qarý saqtaý aıyppul salýǵa, tipti qamaýǵa alýǵa ákep soqtyratynyn eskertedi. Al qarý-jaraq, oq-dárilerdi óz erkimen ákep tapsyrǵandar, eger qylmysqa qatysy bolmasa, jaýapkershilikten bosatylady.
Aıta keteıik, jyl saıyn turǵyndardan zańsyz qarý-jaraqty satyp alý aktsııalary ótkiziledi. Bıyl Aqmola oblysynyń turǵyndary 79 atys qarýyn tapsyrǵan, sonyń úsheýi ıir oıyqty myltyq, 76-sy tegis uńǵyly qarý. Olarǵa jalpy 4 mıllıon 500 000 teńge ótemaqy berildi.
