Kókshetaýda erekshe kútimdi talap etetin balalardyń Jańa jyldyq shyrshasy ótti
KÓKShETAÝ. QazAqparat-Kókshetaý kásipkerleri men qoǵam belsendileri erekshe kútimdi talap etetin balalarǵa Jańa jyldyq shyrsha uıymdastyrdy, dep habarlaıdy QazAqparat tilshisi.
«Aqmola oblysynyń isker áıelderi qaýymdastyǵy» jáne «Kókshetaý» arnaıy olımpıada» qoǵamdyq birlestikteri birlesip, uıymdastyrǵan merekelik sharaǵa erekshe kútimge muqtaj 70 bala men olardyń ata-analary qatysty.
Balalar shyrshany aınala án aıtyp, bı bılep, Aıaz ata men Qarshaqyzǵa óz ónerlerin kórsetti. Jańa jyldyq qoıylymda súıikti ertegilerdiń keıipkerleri búldirshindermen birge ata-analaryn da oıynǵa tartty.
«Biz Jańa jyldyq sharany ózge qoǵamdyq uıymdarmen birlesip ótkizý qajet dep sheshtik. Nátıjesinde «Perishte-Balalar» qaýymdastyǵynan erekshe kútimdi talap etetin 36 baladan bólek, «Kókshetaý» arnaıy olımpıada» qoǵamdyq birlestiktiginen taǵdyry qıyn 35 bala qatysty. Olarǵa úlestirilgen syılyqtar oblys aýmaǵyndaǵy kásipker áıelderden jınaǵan qarajatqa satyp alyndy. Demeýshilerdiń qatary jyl ótken saıyn artyp keledi», - deıdi «Aqmola oblysynyń isker áıelderi qaýymdastyǵy» qoǵamdyq birlestiginiń ókili, «Garant» jyljymaıtyn múlik agenttiginiń dırektory Ǵalııa Zııaddenova.
Dál osyndaı pikirdi «MASTER DRIVE» avtokesheniniń basshysy Irına Omelıan da óz sózinde atap ótti.
Shara sońynda balalaryna qyzyqty Jańa jyldyq shyrsha uıymdastyrǵan jandarǵa ata-analar tarapynan da alǵystar aıtyldy.
