Kókshetaýda er adam tanysynyń atyna onlaın-nesıe rásimdegen
KÓKShETAÝ. QazAqparat - Kókshetaýda tanysynyń atyna zańsyz onlaın- nesıe rásimdegen kúdikti ustaldy, dep habarlaıdy QazAqparat tilshisi PD baspasóz qyzmetine silteme jasap.
Polıtseılerdiń dereginshe, 9 qazan kúni Kókshetaý qalalyq PB kezekshi bólimine jergilikti turǵynnan aryz túsken. Aryzdanýshynyń sózinshe, sáýir aıynda onyń atynan belgisiz bireýler 15 myń teńge kóleminde onlaın- nesıe rásimdegen. Zardap shegýshi óziniń atyna rásimdelgen nesıeniń baryn bilgende negizgi qaryzynan bólek, ósimpul da jınalyp qalǵanyn anyqtaıdy. Qazirgi kezde zardap shegýshiniń shaǵyn nesıe beretin uıymǵa qaryzy 200 myń teńgeden asyp ketken.
Júrgizilgen sharalar barysynda nesıeni zardap shegýshiniń tanysy rásimdegeni anyqtaldy. Buǵan deıin zardap shegýshi qyz ınternet arqyly nesıe alyp, ony paıyzdyq ósimimen jaýyp tastaǵan. Osydan habary bar tanys er adam onyń jeke málimetterin paıdalanyp, nesıe rásimdegen. Qazirgi kezde osy oqıǵaǵa baılanysty QR QK 191-babynyń 1-bóligi boıynsha («Alaıaqtyq») is qozǵalyp, sotqa deıingi tergeý amaldary júrgizilip jatyr.
«Qazirgi kezde polıtsııada alaıaqtyq qylmystar jıi tirkelýde. Ásirese, ınternet jáne áleýmettik jeli arqyly jasalatyn alaıaqtyq qylmysy órship tur», - deıdi polıtsııa qyzmetkerleri.
