Kókshetaýda eńbek ardagerleri marapattaldy
KÓKShETAÝ. QazAqparat - Bıyl elimiz Táýelsizdiginiń 25 jyldyǵymen tuspa-tus kelgen Qarttar kúni merekesin aqmolalyq qarııalar saltanatpen atap ótti.
«Dostar» mádenıet saraıynda uıymdastyrylǵan sharaǵa qatysqan oblystyq ishki saıasat basqarmasy basshysynyń orynbasary Ásemgúl Sadyr oblys ákiminiń orynbasary Nurlan Nurkenovtiń ardagerlerge arnalǵan quttyqtaý hatyn oqyp berdi. Astanalyq oblystyń áleýmettik-ekonomıkalyq damýyna súbeli úlesin qosqan ardagerlerdiń eńbegi eshqashan eskerýsiz, umyt qalmaq emes. Memleket basshysynyń halyqty áleýmettik jaǵynan qorǵaý baǵytyndaǵy saıasatynyń arqasynda álemdi bılegen daǵdarysqa qaramastan, bul salaǵa bólinetin qarjy kólemi kemigen emes. Zeınetaqy men járdemaqy jyl sanap ósip keledi. Munyń barlyǵy zeınetkerlerge jasalyp otyrǵan qamqorlyq ekeni anyq.
Oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Dına Ahmetjanova saltanatqa jınalǵan ardagerlerge degen aq tilegin aıtyp, olarǵa uzyq ómir, zor densaýlyq tiledi. Búgingi tańda oblys aýmaǵynda qarttarǵa arnalǵan 10 ınternat jumys isteıdi. Memleket qamqorlyǵyna alynǵan bul qarııalarǵa barlyq jaǵdaılar qarastyrylǵan.
Al, oblystyq ardagerler keńesiniń tóraǵasy Ǵosman Tóleǵul bolsa, qarııalarǵa degen júrkejardy lebizin bildirip, búgingi kúni oblysymyzda 107843 zeınetker bar ekendigin atap ótti.
Shara barysynda bir top ardager oblys ákiminiń Alǵys hatymen marapattaldy. Olardyń arasynda Bıbigúl Jandaeva, Baǵıla Qasenova, Nıkolaı Lıholad, Altaı Nurǵasymov sııaqty eńbek ardagerleri bar. Saltanatty jıynnyń sońy jergilikti ónerpazdardyń oryndaýyndaǵy kontserttik baǵdarlamaǵa ulasty.
