Kókshetaýda elektr kabeliniń zaqymdanýynan 450 abonent jylýsyz qaldy
ASTANA. KAZINFORM — Zaqymdanǵan elektr kabeli Kókshetaýdaǵy Nazarbaev-Qusaıynov kósheleriniń aýmaǵyn jylýmen qamtamasyz etedi. Apatty jaǵdaıǵa tap bolǵan kókshetaýlyqtarǵa aqmolalyq qutqarýshylar qol ushyn berdi, dep habarlaıdy Kazinform tilshisi.
Aqmola oblysy TJD baspasóz qyzmetiniń habarlaýynsha, 8 jeltoqsan kúngi qatty aıaz kezinde qutqarýshylar oblys ortalyǵynyń kommýnaldyq qyzmetine kómek kórsetýge májbúr boldy.
— Jylý sorǵy stantsııasyn qorektendiretin elektr kabeliniń zaqymdanýynan 450 abonent jylýsyz qaldy. Oqıǵa ornyna MÓB-2 qutqarýshylary jetip, shuǵyl jumystarǵa qosyldy. Jylý sorǵy stantsııasyn elektrmen jabdyqtaýdy Kókshetaý qalasynyń MÓB-2 kóp fýnktsıonaldy órt sóndirý avtokóligi arqyly berý týraly sheshim qabyldandy, — dep túsindirdi Kókshetaý qalalyq MÓB-2 bóliminiń bastyǵy Jandos Jarmuhanbetov.
Qazir apatty joıý jumystary júrgizilip jatyr, jylý sorǵy stantsııasy arnaıy qondyrǵylarǵa qosylǵan. Onyń qýaty mýnıtsıpaldy mekemeniń qalypty jumys isteýi úshin jetkilikti.
Vedomstvonyń habarlaýynsha, jumys apat tolyq joıylǵansha jalǵasady. Ázirge qutqarýshylar kezekshilikke shyǵyp, jylý ádettegideı berilip jatyr.
Buǵan deıin Aqmola oblysynyń ákimi Marat Ahmetjanov Kókshetaýda jylý elektr ortalyǵyn salý qalaı júrip jatqanyn aıtyp berdi.