Kókshetaýda «Egemen Qazaqstan» gazeti oqyrmandarynyń konferentsııasy ótti
KÓKShETAÝ. QazAqparat - Kókshetaýda respýblıkalyq «Egemen Qazaqstan» gazetiniń 100 jyldyǵyna arnalǵan «Egemen - Otanymyzdyń bas gazeti» atty oqyrmandar konferentsııasy ótti, dep habarlaıdy QazAqparat tilshisi.
Konferentsııaǵa qatysýshylar úshin memlekettiliktiń qalyptasýyna qosqan úlesin sıpattaıtyn gazet nómirlerinen, kitaptardan kórme uıymdastyryldy.
Respýblıkanyń basty merzimdik basylymyn quttyqtaýǵa qoǵam qaıratkerleri, jýrnalıstıka ardagerleri, ǵylymı jáne shyǵarmashylyq qoǵam ókilderi men oqý oryndarynyń stýdentteri keldi.
Óziniń quttyqtaý sózinde Aqmola oblysy ákiminiń orynbasary Aına Mysyrálimova basylymnyń mańyzdylyǵyn jáne onyń qazaq baspasózin damytýdaǵy rólin atap ótti.
«Egemen Qazaqstan» gazeti elimizdiń basty basylymy. Táýelsiz elimizdiń qalyptasýy men damýynyń jylnamasyn júrgizip keledi. Jyldar boıy gazet talantty jýrnalısterdiń úlken shoǵyry ótken kásipqoılyq mektebi bolyp qala beredi. Bir ǵasyr boıy el gazetiniń betterinde eldiń tarıhy, eldiktiń tarıhy qalyptasty, soǵan kıeli Kókshe óńiri azamattarynyń da qatysy bar ekeni – biz úshin maqtanysh. Buǵan «Egemen Qazaqstan» gazetiniń ardagerleri - Qorǵanbek Amanjol, Baqbergen Amalbek aǵalarymyzdyń, bedeldi tilshi Baıqal Baıádildiń eńbek joly dálel bola alady» - dedi Aına Mysyrálimova.
Іs-shara barysynda basylymnyń menshikti tilshileri Aqmola oblysy ákiminiń Alǵys hattarymen marapattaldy.
Konferentsııa qatysýshylardyń sózimen jalǵasty. Baıandamashylar Qazaqstan oqyrmandary úshin basylymnyń mańyzdylyǵy týraly aıtyp ótti.
Tarıhı dáýirdiń qıyn-qystaý sátinde dúnıege kelgen baspa basylymy árqashan respýblıkanyń qoǵamdyq, iskerlik jáne mádenı ómirinen tys qalmady. Gazet betterinde naǵyz reportaj jáne pýblıtsıstıka sheberleri, belgili ádebıetshiler men memleket qaıratkerleriniń materıaldary jarııalandy.
Aıta keteıik, gazettiń 100 jyldyq mereıtoıy respýblıka boıynsha ótýde.
