Kókshetaýda dúrkiretip toı ótkizgender anyqtalyp, ákimshilik jazaǵa tartyldy
Aqmola oblystyq sanıtarlyq-epıdemıologııalyq baqylaý departamenti baspasóz qyzmetiniń málimetinshe, óńir koronavırýstyń taralý qarqyny boıynsha «qyzyl» aımaqta ornalasqanyna qaramastan, turǵyndar tarapynan karantın rejımin buzý jaǵdaılary jıiledi.
«Ótken demalys kúnderi Kókshetaý qalasynda monıtorıngtik top karantın talaptaryn buza otyryp, tórt saltanatty is-sharanyń ótkizilgenin anyqtady. Onyń ishinde kópshiliktiń qatysýymen ótken bir úılený toıy, eki qyz uzatý jáne bir týǵan kúni merekesi bar. Máselen, «Kókshetaý» qonaq úıinde ótken úılený toıyna 120 adam qatysty. Al «Bala mahabbat» meıramhanasynda 120 qonaqtyń qatysýymen otbasylyq mereke ótkizilse, «Han Saraıy» meıramhanasynda 90 adam jáne «Merýert» meıramhanasynda 120 adamnyń qatysýymen «qyz uzatý» toıy uıymdastyryldy», - dedi vedomstvodan.
Departamenttiń baspasóz qyzmetinen atap ótkendeı, karantın talaptaryn buzý boıynsha materıaldar Aqmola oblysynyń sanıtarlyq-epıdemıologııalyq baqylaý departamentine joldandy. Bıylǵy jyly monıtorıngtik toptar karantın talaptaryn saqtaý boıynsha 29 189 nysandy tekserip, onda karantın talaptarynyń 628 ret buzylǵanyn anyqtady.
«Jalpy, uıǵarylǵan sanıtarlyq-karantındik erejelerdi saqtamaǵany úshin shaǵyn jáne orta bıznes sýbektilerine, sondaı – aq jeke tulǵalarǵa qatysty ákimshilik yqpal etý sharalary (650 aıyppul) qoldanylyp, 16 materıal ákimshilik sottarǵa qaraý úshin joldandy», - dep tolyqtyrdy vedomstvodan.
Eske sala ketsek, Aqmola oblysynyń bas memlekettik dárigeriniń qaýlysyna sáıkes saltanatty, estelik, otbasylyq is-sharalar, banketter, úılený toılary, mereıtoılar ótkizýge ruqsat etilgen bolatyn. Ruqsat etilgen, biraq belgilengen sanıtarlyq erejelerdi qatań saqtaı otyryp, kelýshiler Ashyq-te «jasyl» mártebege ıe bolýy kerek jáne bólmeniń toltyrylýy 50 paıyzdan nemese 50 orynnan aspaýy tıis.
