Kókshetaýda dárigerlerge arnalǵan 40 páterli turǵyn úı salynýda
KÓKShETAÝ. QazAqparat - Kókshetaýda dárigerler arnalǵan 40 páterli turǵyn úı salynýda. Aımaq basshysy Ermek Marjyqpaev jańadan salynyp jatqan atalmysh turǵyn úıdiń qurylys jáne jol jóndeý jumystarynyń barysymen tanysty, dep habarlaıdy Aqmola oblysy ákimdiginiń baspasóz qyzmetine silteme jasap.
Merdigerlerdiń sózinshe, jaqyn kúnderi 260 páterdiń kilti tapsyrylmaqshy.
«Qazirgi kezde búkil dúnıejúzi elderindegideı bizdiń oblysymyzda da koronavırýs ınfektsııasyna qarsy kúres júrgizilýde. Búgin biz jańadan salynǵan PTR (polımerazalyq tizbek reaktsııa) jáne farmatsevtıkalyq zerthanalardy ashtyq. Onda kez kelgen adam koronavırýs ınfektsııasyna test tapsyra alady. Ótken aptada dárigerlermen ótken kezdesýde sáýir aıynyń sońynda turǵyn úı qurylysyn bastaıtynymyzdy aıtqan edim. Búgin ózderińiz kórip otyrǵandaı dárigerlerge arnalǵan 40 páterli turǵyn úıdiń qurylys júrgizilýde. Bul úı tapsyrylǵannan soń, osy baǵyttaǵy jumystardy odan ári jalǵastyrýdyń múmkindigin qarastyratyn bolamyz. Dárigerler úshin úı salýdyń qajettigi týyndap otyr. Oblysymyzda dárigerlerdiń jetispeýshiligine osy sebep bolyp otyrǵan jaıy bar», - dep atap ótti aımaq basshysy.
Aıta keteıik, Kókshetaýda búginnen bastap jańadan salynǵan PTR (polımerazalyq tizbek reaktsııa) jáne farmatsevtıkalyq zerthanalar jumysyn bastady. Turǵyndar qajetti analızderin tapsyra alady. Máselen, koronavırýs ınfektsııasynan bólek, gepatıt, nesep-jynys ınfektsııalaryna tárizdi ózge aýrýlarǵa da synama alynady.
