Kókshetaýda dárigerler jol apatyna túsken jańa týǵan sábıdiń ómirin saqtap qaldy
KÓKShETAÝ. KAZINFORM – Ismaıylovtar otbasy 7 qarashada perzenthanadan úılerine qaıtyp kele jatyp, Astana – Petropavl tasjolynda jol apatyna ushyraǵan. Nebári tórt kúndik sábı aýyr jaraqat alyp, eki apta boıy Aqmola oblystyq balalar aýrýhanasynda emdeldi. Dárigerlerdiń arqasynda náreste aman qalyp, 20 qarashada úıine shyǵaryldy.
Jol-kólik oqıǵasy avtojoldyń 312-shaqyrymynda saǵat 16:00 shamasynda bolǵan. Rýslan Ismaıylovtyń aıtýynsha, júk kóligi qarsy baǵyttaǵy jolaqqa shyǵyp ketip, eki jeńil avtokólikpen soqtyǵysqan. Apattan keıin ol birden jaqyndaryn kólikten alyp shyǵýǵa kirisken.
– Sol sátte barynsha sabyr saqtaýǵa tyrystym. Birden kólikke júgirip baryp, jaqyndarymdy syrtqa shyǵara bastadym. Kólik órtenip kete me dep qoryqtym. Ol kezde apattyń saldary osynshalyq aýyr bolatynyn túsingen joqpyn. Jaqyndaryńdy osyndaı kúıde kórý óte aýyr. Mundaı jaǵdaıdy eshkimniń basyna bermesin, – deıdi Rýslan Ismaıylov.
Oqıǵa ornyna jedel járdemniń eki brıgadasy jetken. Náreste shuǵyl túrde aýrýhanaǵa jetkizilip, anasy jansaqtaý bólimine jatqyzylǵan. Dárigerler sábıdiń jaǵdaıy óte aýyr ekenin birden eskertken.
ıÝlıanna aýrýhanaǵa asa aýyr jaǵdaıda túsken. Dárigerler onyń bas-mı jaraqatyn alǵanyn, bilegi synǵanyn anyqtaǵan. Sondaı-aq buǵanasyna ota jasaýǵa týra kelgen.
– Qyzymyz eki aptadaı komada jatty. Ómirge kelgenine nebári birneshe kún bolǵan sábıdiń osyndaı aýyr apatqa tap bolǵanyn oılaýdyń ózi qıyn. Onyń qandaı jaǵdaıdy bastan ótkergenin sózben aıtyp jetkizý múmkin emes, – deıdi ákesi.
Eki apta boıy dárigerler sábıdiń jaǵdaıyn jiti baqylap, nevrologııalyq jaı-kúıin, tynys alýyn jáne ómirlik mańyzdy aǵzalarynyń jumysyn tekserip otyrǵan.
Aýrýhana málimetinshe, ýaqyt óte kele náresteniń jaǵdaıy turaqtala bastaǵan. Oń ózgerister baıqalǵan soń, ol jansaqtaý bóliminen beıindi bólimshege aýystyrylǵan.
20 qarashada ıÝlıanna úıine shyǵaryldy. Sábıdiń anasy Marııa osy qıyn kezeńde qyzynyń ómiri úshin kúresken dárigerler men meıirbıkelerge alǵysyn bildirdi.
– Otbasymyzdyń atynan oblystyq balalar aýrýhanasynyń búkil ujymyna sheksiz alǵys aıtqym keledi. Kásibıligi men qamqorlyǵy, bizge úmit syılaǵany úshin raqmet. Medıtsına qyzmetkerleriniń qyzymyzǵa óz balasyndaı qaraǵany bizdi erekshe tebirentti. Jansaqtaý bóliminde odan bir sát te kóz jazbaı, janynan tabyldy. Keıbir dárigerler tipti otbasymen ótkizetin ýaqytyn qıyp, aýrýhanada qalǵan. Olardyń eńbegine degen alǵysymyzdy sózben jetkizý múmkin emes, – deıdi Marııa.
Qazir sábıdiń jaǵdaıy edáýir jaqsarǵan. Degenmen alda ońaltý sharalary, qaıtalama tekserýler men dárigerlerdiń baqylaýy kútip tur.
– Búgin aýrýhanadan shyǵyp, úıimizge qaıtamyz. Jansaqtaý bóliminiń búkil ujymyna alǵysym sheksiz. Jumys ornymdaǵy áriptesterime de rızamyn. Olar bizge materıaldyq jaǵynan da, moraldyq turǵydan da qoldaý kórsetti. Qıyn sátte habarlasyp, jaǵdaıymyzdy surap, qyzymyz úshin duǵa etken barsha qala turǵynyna raqmet. Biz qyzymyzdyń aman qalatynyna sendik, úmitimizdi úzbedik. Búgin qyzymyz janymyzda. Endi úıge birge qaıtamyz, – deıdi Rýslan Ismaıylov.
Aqmola oblysy polıtsııa departamentiniń málimetinshe, jol apatyna Volvo markaly júk kóligi, Hyundai Genesis jáne Lada Granta avtokólikteri qatysqan.
– Jol-kólik oqıǵasy saldarynan Hyundai Genesis avtokóliginiń júrgizýshisi men tórt jolaýshysy túrli dene jaraqattarymen medıtsınalyq mekemege jetkizildi. Qazirgi ýaqytta sotqa deıingi tergep-tekserý júrgizilip jatyr. Onyń nátıjesi boıynsha protsestik sheshim qabyldanady, – dep habarlady polıtsııa departamenti.
Vedomstvo júrgizýshilerdi jol qozǵalysy erejelerin saqtaýǵa, belgilengen jyldamdyq rejıminen aspaýǵa jáne jolda muqııat bolýǵa shaqyrdy.
Buǵan deıin 18 qarashada Aqmola oblysynyń tasjoldarynda úsh birdeı jol-kólik oqıǵasy bolyp, saldarynan alty adam kóz jumǵanyn habarlaǵan bolatynbyz.