Kókshetaýda dámhanada keshki as ishken 17 stýdent ýlanyp qaldy
Óńirdiń sanıtarlyq-epıdemıologııalyq baqylaý departamenti baspasóz qyzmetiniń málimetinshe, Kókshetaýda 2 kýrs stýdentteri arasynda jappaı tamaqtan ýlaný deregi tirkelgen. Bul jaǵdaıda dámhanada keshki as iship, sýshı jıyntyǵyna tapsyrys bergen 17 adam zardap shekti. Keıin keshki as ishkenderdiń barlyǵynda júrek aıný, qusý, dıareıa jáne dene temperatýrasynyń joǵarylaýy týraly birdeı shaǵymdar boldy.
«Sanıtarlyq qyzmet dámhanaǵa jospardan tys tekserý júrgizgen kezde aýrýdyń taralýyna yqpal etken sanıtarlyq erejelerdiń óreskel buzylǵandyqtaryn anyqtady. Naqtyraq alsaq, tehnologııalyq úrdis saqtalmaǵany, ystyq sýmen jabdyqtalmaǵany, ydys - aıaqty sapasyz óńdelgeni, tamaq ónimderinde ishek taıaqshasy men stafılokokk tobynyń bakterııalary, óndiristik baqylaý baǵdarlamasynyń obektisinde bolmaýy, óndiristik baqylaý júrgizýge sharttyń bolmaýy, qyzmetkerlerde stafılokokk bary anyqtaldy. Sonymen birge, qyzmetkerleri medıtsınalyq tekseristen ýaqytyly ótpegen», - dep túsindirdi vedomstvodan.
Osy rette, Aqmola oblysynyń sanıtarlyq dárigerleri óńir turǵyndary men qoanaqtaryna japon taǵamdaryn satyp alýda abaı bolýǵa shaqyrady.
Aıta ketsek, Aqmola oblysynda qonaqta otyrǵanda óńeshine et turyp qalǵan er adam qaıtys boldy.
