Kókshetaýda býkmekerlik keńseniń qyzmetkerleri klıentke jala japqan
KÓKShETAÝ. QazAqparat - Kókshetaýdyń eki turǵyny býkmekerlik keńseniń turaqty klıentine qatysty jalǵan aqparat bergen, dep habarlaıdy QazAqparat tilshisi PD baspasóz qyzmetine silteme jasap.
Vedomstvonyń málimetinshe, Kókshetaý qalalyq PB kezekshilik bólimine «Loto Klýb» býkmekerlik keńsesiniń turaqty klıenti 3 mıllıon teńgege jýyq aqsha urlaǵany týraly habar tústi.
«Polıtsııa osy boıynsha birden Qylmystyq kodekstiń «tonaý» baby boıynsha is qozǵap, tergeý amaldaryn bastap ketti. Alaıda, tergeý kezinde býkmekerlik keńseniń eki qyzmetkeri kúdiktige óz erkimen kassadan 1 mıllıon 214 myń teńge aqshany bergeni anyqtaldy», - deıdi vedomstvodan.
Býkmekerlik keńseniń eki qyzmetkeri - 22 jáne 41 jastaǵy áıelderge qatysty sotqa deıingi tergeý amaldary júrgizilýde. Al 22 jastaǵy áıelge baılanysty «jalǵan aqparat berý» baby boıynsha is qozǵaldy.
