Kókshetaýda búgin túnde jylytý maýsymy aıaqtalady

KÓKShETAÝ. KAZINFORM – Oblys ortalyǵy turǵyndarynyń páterlerine jylý berý 24 sáýirde saǵat 24:00-de toqtatylady.

Kókshetaý qalasy ákimdigi baspasóz qyzmetiniń málimetinshe, belgilengen normatıvterge saı, aýa raıy jaǵdaılaryn eskere otyryp jáne turǵyndardyń kóptegen ótinishine oraı qala ákimi Ánýar Kúmpekeev 2025 jylǵy 24 sáýirde saǵat 24:00-de jylý berýdi toqtatýǵa sheshim shyǵardy.

— Normatıvke sáıkes jylytý júıesi aýanyń ortasha táýliktik temperatýrasy +10 °S jáne odan joǵary deńgeıde turaqtanǵan kezde óshiriledi. Qazirgi klımattyq jaǵdaılar osy talapqa sáıkes keledi. Bul jylý jelileriniń jazǵy jumys rejımine kóshý qajettiligin rastaıdy, - dep atap ótti vedomstvodan.

Qala ákimdigi jylý júıesinen ajyratýdy jaýapkershilikpen atqarý qajettigin eskertti. Bul tótenshe jaǵdaılardyń aldyn alý jáne jylý jelileriniń turaqty jumysy úshin qajet.

— Sonymen qatar jylý júıesine artyq qysymnyń túsýin boldyrmaý úshin mamandar jylý pýnktterinen keıin kórinetin úzilisterdi oryndaýy kerek. Bul sharalar jabdyqqa qosymsha júktemeler týyndamaı, jańa maýsymǵa qaýipsiz ótýge baǵyttalǵan, - dep túıindedi vedomstvodan.

Buǵan deıin Astanada jylytý maýsymy aıaqtalǵanyn jazǵan edik.