Kókshetaýda boıjetkendi zorlaǵan kúdikti ustaldy
KÓKShETAÝ. QazAqparat – Kókshetaýda Ulttyq ulan sarbazdary boıjetkendi zorlaǵan kúdiktini ustady, dep habarlaıdy QazAqparat tilshisi.
Ulttyq ulannyń baspasóz qyzmetinen málim etkendeı, aǵymdaǵy jyldyń 3 tamyzynda saǵat 22:00 shamasynda jedel basqarý ortalyǵyna Nazarbaev dańǵylynda belgisiz er adamnyń boıjetkendi zorlaǵany týraly aqparat túsken.
«Oqıǵa ornyna áskerı jasaqtyń leıtenanty Jandos Áljanov, patrýldeý júrgizetin qatardaǵy sarbazdar Rýslan Orazhan, Nurjan Tasbolat, Mınetaı Kabez jetip, aldyn ala berilgen baǵyttama boıynsha kúdiktini izdestirý sharalaryn qolǵa alady.
Jedel izdestirý sharasy kezinde áskerı jasaq pen polıtsııa qyzmetkerleri kúdiktini kópke uzatpaı ustady. Ol Kókshetaý qalasynyń 1979 jylǵy turǵyny bolyp shyqty. Kúdikti qylmysyn moıyndaǵany týraly túsinikteme berdi. Qyraǵylyq pen jedeldiktiń arqasynda kúdikti ustalyp, ýaqytsha ustaý oqshaýlaǵyshyna qamaldy», - dedi vedomstvonyń baspasóz qyzmetinen.
Aqmola oblystyq Polıtsııa departamenti baspasóz qyzmetiniń aqparatynsha, fakti boıynsha qylmystyq is qozǵaldy.
«Qazirgi kezde osy oqıǵa baılanysty qylmystyq is qozǵalyp, sotqa deıingi tergeý amaldary júrgizilýde», - dedi PD-dan.
