Kókshetaýda boıjetkendi kóshede zorlap, telefonyn tartyp alǵan kúdikti ustaldy
KÓKShETAÝ. QazAqparat – Kókshetaýda boıjetkendi kóshede pyshaqpen qorqytyp, zorlap, uıaly telefonyn tartyp alyp ketken kúdikti ustaldy, dep habarlaıdy QazAqparat Aqmola oblystyq polıtsııa departamentiniń baspasóz qyzmetine silteme jasap.
Vedomstvonyń málimetinshe, Kókshetaý qalalyq polıtsııasynyń kezekshi bólimine 20 jastaǵy boıjetkennen aryz túsken. Aryzdanýshynyń sózinshe, 2020 jylǵy qyrkúıektiń 29-da tańǵy saǵat 07:30 shamasynda Jambyl jáne Sadýaqasov kósheleriniń qıylysynda belgisiz er adam ony pyshaqpen qorqytyp, zorlaǵan, keıin «Samsýng» uıaly telefonyn tartyp alyp, ketip qalǵan.
«Osy is boıynsha oblystyq PD jeke quramy men kúshteri jedel-izdestirý sharasyn qolǵa aldy. Qylmys jasalǵan aýmaqtaǵy beınebaqylaý kameralary qaraldy, sondaı-aq, jábirlenýshilerdiń sıpattamasy boıynsha uqsas polıtsııa esebinde turǵan 26 adam tekserildi» deıdi vedomstvodan.
PD baspasóz qyzmeti atap ótkendeı, jedel-izdestirý sharasy barysynda qazannyń 14-de Zerendi aýdanyndaǵy aýyldardyń birinen 30 jastaǵy kúdikti anyqtalyp, ustaldy.
Kúdikti óz kinásin tolyq moıyndady.
«Qazirgi kezde kúdiktiniń ústinen Qylmystyq kodekstiń 120-babynyń 2-bóligi «Zorlaý» jáne 192-babynyń 2-bóligi «Qaraqshylyq» boıynsha qylmystyq is qozǵalyp, tergeý amaldary júrgizilýde» dep tolyqtyrdy vedomstvodan.
