Kókshetaýda boýlıngke salyq 8 esege tómendetildi
Vedomstvonyń málimetinshe, búgingi kúni Kókshetaý qalasynda birde bir boýlıng-klýb joq. Bul árıne, salyqtyń úlken bolýyna baılanysty. Osyǵan oraı, Kókshetaý qalalyq memlekettik kirister basqarmasy óńirlik kásipkerler palatasyna boýlıng, bılıard jáne aqsha aıyrbastaý pýnktterine belgilengen salyq mólsherlemesi kólemi jobasyn joldady.
Sarapshylar mólsherlemeni taldaı kele, boýlıngke salynatyn salyqtyń tym kóp eken aıtyp, tanymal oıynǵa salyqty azaıtý týraly usynys bildirdi.
«QR Salyq kodeksiniń 546 babynyń, 3 bóligi boıynsha jergilikti atqarýshy organdar ákimshilik-aýmaqtyq birlik aýmaǵynda qyzmet isteıtin barlyq salymshylarǵa biryńǵaı belgilengen salyq mólsherlemesin belgileıdi.
Kelissózder nátıjesinde Kókshetaý qalalyq máslıhaty boýlıngtiń bir oıyn alańyna belgilengen salyq mólsherlemesiniń kólemin 8 esege, ıaǵnı, 40 AEK-ten (101 000 teńge) 5 AEK-ke deıin (12 625 teńgege) túsirdi.
Buryn belgilengen salyq mólsherlemesi 5 jolaqty boýlıngke jylyna 6 mıllıon teńgeni qurasa, endi 750 myń teńge shamasynda bolyp otyr», deıdi óńirlik kásipkerler palatasynyń dırektory Shyńǵys Temir.
Qoldanystaǵy salyq mólsherlemeni taldaý kórsetkendeı, Aqmola oblysynyń aýdandarynda salyq organdarymen salymshylardyń qyzmeti tıisti deńgeıdi zerttelmeıdi.
«Máselen, memlekettik kirister departamentiniń derekteri boıynsha oblysta boýlıngke arnalǵan barlyǵy 3 alań jumys isteıdi. Onyń ekeýi Zerendi aýdanynda bolsa, bireýi Stepnogorsk qalasynda. Býrabaı aýdanynda da salyq aıyna 40 AEK boldy. Tek bıylǵy jyldyń mamyrynan bastap 20 AEK tómendetildi. Eń kóp salyq mólsherlemesi Bulandy aýdanynda aıyna 83 AEK boldy. Bul eki aýdanda da boýlıng oıyn alańynyń bolmaýy joǵary salyq mólsherlemesiniń atalmysh bıznesti damytýǵa kedergi keltirip otyrǵanyn bildiredi», deıdi vedomstvonyń baspasóz qyzmetindegiler.
Respýblıka boıynsha salystyratyn bolsaq, Qyzylordada - 13 AEK, Aqtaýda – 25 AEK, Shymkentte – 25 AEK, Petropavlda – 33,2 AEK. Elorda men Aqtóbede eń kóp salyq mólsherlemesi anyqtalyp otyr.
