Kókshetaýda «Birjan sal» jınaǵy shyǵady
Kitap «Rýhanı jańǵyrý» baǵdarlamasy sheńberinde Aqmola oblysy ákimdiginiń qoldaýymen jaryq kórmek. Onyń qurastyrýshysy - jazýshy-dramatýrg, Qazaqstannyń eńbek sińirgen qaıratkeri Jabal Erǵalıev.
«Sal-seriler» serııasy 5 kitaptan turady. Onyń birinshisi - «Aqan seri» jınaǵy ótken jyly shyqty. «Birjan sal» jınaǵyna Birjan saldyń óleńderi, aıtystary toptastyrylyp berilmek. Odan keıingileri: úshinshisi - Úkili Ybyraı, tórtinshisi - Balýan Sholaq jáne besinshisi - Imanjúsip Kutpanulynyń shyǵarmashylyǵyna arnalady.
«Aqmola oblysynyń ákimi Málik Myrzalınniń tapsyrýymen jáne qoldaýymen «Sal-seriler» kitaphanasy serııasymen Kókshetaý men Qaraótkel óńirleriniń sal-serileriniń muralaryn jınaqtap, kitap shyǵarýdy qolǵa aldyq. Sal-seri - dástúrli qazaq qoǵamynda erekshe ónerpazdyqpen baılanysty uǵym. El aýzynda sal men seriniń kıim kıisi, júris-turysy, sóılegen sózi, ózindik minezi týraly ańyz kóp. Áıgili Aqan seri men Birjan saldyń tarıhtaǵy orny bir bólek. Tarıhqa kóz júgirtsek, sal-seriler bizdiń oblysymyzdyń aýmaǵynda ómir súrgen. Sondyqtan, bizdiń basty maqsatymyz - babalarymyzdyń baı murasyn keleshek urpaqqa jetkizý.
Aqan serini qazaq dalasynyń teatry deýge bolady. Ol týraly biraz kitaptar basylyp shyǵaryldy. Máselen, jerlesimiz Sáken Júnisov «Aqan seri» trılogııasyn, Ǵabıt Músirepov «Aqan seri - Aqtoqty» dramasyn jazdy. Alaıda, Aqan seriniń shyǵarmashylyǵy áli tolyq zerttelgen joq. Biz bul joly Aqan seriniń óleńderi men aıtysta aıtqan sózderi jáne ol týraly jazylǵan maqalalardy qamtyp otyrmyz. Onyń ishinde negizinen sonaý 20 jyldary jaryq kórgen Maǵjan Jumabaevtyń eńbekteri alynyp otyr. Aqan seriniń ómir joly men shyǵarmashylyǵyn tereń zerttep, kórsete bilgen osy Maǵjan Jumabaev», - deıdi Jabal Erǵalıev.
Eske sala keteıik, ótken jyly «Rýhanı jańǵyrý» baǵdarlamasy sheńberinde «Aqan seri» jınaǵynan bólek, akademık, batyr ári ǵalym Málik Ǵabdýllınniń 11 tomdyǵy, «Málik Ǵabdýllın - qazaqtyń Oqjetpesi», «Jer jánnaty-Aqmola» fotoalbomdary, Sáken Júnisovtiń «Zamanaı men Amanaıy» Londonda aǵylshyn tilinde, Qadyrjan Ábýovtiń kitaptary jəne Jabal Erǵalıevtiń «Álemge! Ǵaryshqa! Bolashaqqa jol ashqan Tuńǵysh!» atty kitaby basylyp shyqty. Sonymen qatar, «Jer jánnaty - AQMOLA» jınaǵy da jaryq kórgen bolatyn.
