Kókshetaýda bir jasqa deıingi 150 bala KVI juqtyrǵan
KÓKShETAÝ. QazAqparat – Kókshetaýda shilde aıynda koronavırýs juqtyrǵandardyń 76%-y – 60 jasqa deıingi adamdar. 14%-y – 17 jasqa tolmaǵan balalar. Odan bólek, bir jasqa deıingi 150 bala COVID-19 juqtyrǵan. Bul týraly Kókshetaý qalasyndaǵy sanıtarlyq-epıdemıologııalyq ahýal týraly ótken brıfıngide oblystyq ortalyqtyń bas memlekettik sanıtarlyq dárigeri Qanat Ysqaqov málim etti, dep habarlaıdy QazAqparat tilshisi.
Spıkerdiń aıtýynsha, álemde COVID-19 boıynsha epıdemıologııalyq ahýal nashar. Al elimizde bir táýlikte 7 519 adam koronavırýs juqtyrǵan. Koronavırýs ınfektsııasynyń taralýy boıynsha respýblıka óńirlerindegi epıdemıologııalyq ahýaldy baǵalap otyratyn matrıtsaǵa sáıkes, 2021 jyldyń 2 shildesinen bastap Aqmola oblysy «qyzyl» aımaqta.
Kókshetaý qalasynda pandemııanyń bastalǵannan beri COVID-19-dyń 9 720 zerthanalyq zerttelgen túri anyqtalǵan. Shilde aıynda 1 527 juqtyrý jaǵdaıy tirkelgen. Maýsym aıynda bul kórsetkish 4,5 ese az bolǵan – 341 jaǵdaı.
«Sońǵy táýlikte 65 vırýs juqtyrý jaǵdaıy anyqtalǵan, olardyń 95%-y – sımptommen, 5%-y – sımptomsyz. Jeti adam qaıtys boldy. Búgingi kúni oblys ortalyǵyndaǵy tósek-oryn qory 115%-ǵa tolǵan. 598 adam aýrýhanaǵa túsip, 65 naýqas jansaqtaý bóliminde em alýda, úsh naýqas ottegine táýeldilik jaǵdaıynda jatyr», - dedi Q. Ysqaqov.
«Koronavırýs jastar arasynda da juqpaly bola bastady. Buryn juqtyratyndardyń basym bóligi 60 jasqa deıingi adamdar bolsa, qazir jastardyń arasynda juqtyrý jaǵdaıy kóbeıgen. Shilde aıynda koronavırýs juqtyrǵandardyń 76%-y – 60 jasqa deıingi adamdar. 14%-y – 17 jasqa tolmaǵan balalar. Bir jasqa deıingi 150 bala COVID-19 juqtyrǵan», - dep qosty Q. Ysqaqov.
