Kókshetaýda «bir tereze» qaǵıdasymen jumys isteıtin polıtsııa front-keńsesi ashyldy
KÓKShETAÝ. QazAqparat - Kókshetaý qalasynda HQO qaǵıdasy boıynsha jumys isteıtin polıtsııanyń front-keńsesi ashyldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Polıtsııa departamenti men kókshetaýlyq polıtsııa basqarmasynyń ǵımaratynda HQO qaǵıdasy boıynsha jumys isteıtin front-keńseniń ashylý rásimi ótti.
Aqmola oblystyq polıtsııa departamentiniń basshysy, polıtsııa general-maıory Berik Bılıalovtyń aıtýynsha, turǵyndarmen jumys isteýde jańa formatty engizý azamattardyń quqyq qorǵaý organdaryna degen senimin nyǵaıtyp, ótinish qabyldaý kezinde ákimshilik kedergilerdi joıýǵa múmindik beredi.
«Front-keńse oblystyq departament pen Kókshetaý qalalyq basqarmanyń ǵımaratynda ornalasqan. Qabyldaý bólmesinde aldyn ala bekitilgen keste boıynsha prokýror jáne polıtsııa qyzmetkeri azamattardyń ótinish-aryzdaryn qabyldaıdy», - deıdi vedomstvodan.
Bul - oblysymyzda birinshi ret ashylyp otyrǵan front-keńse. Munda turǵyndardy qabyldaý úshin barlyq jaǵdaı jasalǵan. Nysanda azamattardyń aryz-shaǵymdaryn qabyldaıtyn arnaıy bólmeler men arnaıy tólem jasaı termınaldar da bar. Tegin Wi-Fi ınternet jelisi, «Adaldyq dúkeni» jumys isteıdi. Aldaǵy ýaqytta oblystyń basqa qalalary men aýdandarynda da azamattarǵa arnalǵan osyndaı front-keńse ashý josparda bar.
