Kókshetaýda bir ǵasyrlyq tarıhy bar meshittiń janynan jańa qulshylyq úıi boı kóteredi
Eske sala keteıik, 2015 jyldyń qyrkúıek aıynda Kókshetaý qalasynda 1200 kelýshige arnalǵan jańa meshit paıdalanýǵa berilgen bolatyn. Sol kezde qala turǵyndary men jergilikti musylmandardyń rýhanı jáne dinı ortalyǵy sanalatyn jańa meshitke Naýan Haziret ataýy berilip, burynǵy eski meshit ataýsyz qalǵan edi. Keıin 2016 jyldyń sáýir aıynda atalǵan meshitke Jaqııa qajy ataýy berildi.
"Qazirgi Jaqııa qajy meshitiniń tarıhy tereńde jatyr. Salynǵanyna bir ǵasyrdan asty. Aǵashtan turǵyzylǵan meshittiń syny ketse de, syry ketpeıtini anyq. Biraq, ýaqyt ozǵan saıyn ábden eskirip, birde irgesi sógilip, endi birde munarasy syr berip jatqany taǵy jasyryn emes. Sondyqtan, eski qulshylyq ǵımaraty janynan jańa meshit salý týraly sheshim qabyldandy", deıdi Naýan Haziret atyndaǵy meshittiń baspasóz qyzmeti.
Meshit basshylyǵynyń málimetinshe, jańa meshittiń qurylysyn "Alýa stroı" JShS júrgizýde. Jańa dinı ǵımaratta osy zamanǵy qulshylyq orny, ashanasy jáne basqa da qyzmettik keńseleri qarastyrylǵan.
Al, "Rýhanı jańǵyrý" baǵdarlamasy sheńberinde óńirdiń kıeli jerleri tizimine kirgen Jaqııa qajy atyndaǵy eski meshit mýzeı retinde paıdalanylatyn bolady.
Aıta ketý kerek, Jaqııa qajy Beısembaıuly 1932 jyly Omby oblysynyń Lıýbın aýdanyna qarasty qazaq aýylynda dúnıege kelgen. Kishkentaıynan ıman jolyn tańdap, 1959 jyly Ózbekstannyń Buhara qalasyndaǵy «Mır-arab» medresesinde, Damask Islam ýnıversıtetinde «Sharıhat» fakýltetinde bilim alǵan.
