Kókshetaýda belgili boksshy áıelin soqqyǵa jyqty degen kúdikpen qylmystyq is qozǵaldy
ASTANA. KAZINFORM – Kókshetaýda belgili qazaqstandyq boksshy Temirtas Júsipov áıeline dene jaraqatyn saldy degen kúdikke ilindi. Oqıǵaǵa baılanysty polıtsııa qylmystyq is qozǵady.
Áleýmettik jelide zardap shekken áıeldiń ápkesi osy oqıny túsirgen jazbasyn jarııalady.
Onyń aıtýynsha, belgili boksshy Temirtas Júsipov áıelin soqqyǵa jyqqan. Sonyń saldarynan áıel aýrýhanaǵa jetkizilgen.
— Medıtsınalyq qujattarda tunshyǵý belgileri, basyndaǵy ashyq jaraqat, qurysý jáne mı isinýi tirkelgen. Ápkem kúıeýi qamaýdan shyqqannan keıin de qorqytyp, ajyrasqan jaǵdaıda óltiretinin aıtyp, balalaryn tartyp alý úshin ony psıhıkalyq aýrý retinde kórsetýge áreket jasaǵanyn aıtqan, — dedi jábirlenýshiniń týysy.
Áıeldiń ápkesi tergeý barysyna alańdaýshylyq bildirip, kúdiktiniń ustalǵannan keıin shamamen bes saǵattan soń bosatylǵanyn aıtty.
Al Aqmola oblysynyń densaýlyq saqtaý basqarmasy zardap shekken áıelge mıynyń shaıqalýy jáne betiniń jumsaq tinderiniń soǵylýy dıagnozy qoıylǵanyn habarlady.
Vedomstvo málimetinshe, oǵan shuǵyl hırýrgııalyq kómek qajet bolmaǵan. Áıel aýrýhanaǵa jatýdan óz erkimen bas tartqany týraly qolhat jazǵan.
Al Aqmola oblysy polıtsııa departamenti atalǵan derek boıynsha densaýlyqqa qasaqana zııan keltirý faktisimen qylmystyq is qozǵalǵanyn málimdedi.
Polıtsııa departamentiniń málimetinshe, 30 maýsym kúni Kókshetaý qalasynyń turǵyny otbasylyq janjal kezinde jubaıyna dene jaraqatyn salǵan. Qazir is boıynsha barlyq mán-jaı jan-jaqty tekserilip jatyr. Tergeý qorytyndysyna sáıkes kináli tulǵanyń áreketine quqyqtyq baǵa berilip, zań aıasynda jaýapkershilikke tartylady.
Eske salaıyq, buǵan deıin Qaskeleń qalasynda jasóspirimderdiń er adamdy soqqyǵa jyqqany týraly habarlanǵan edi. Oqıǵaǵa qatysy bar kúdiktiler ustaldy.
