Kókshetaýda baspasóz qaıratkeri Bıjanovtyń turǵan úıine eskertkish taqta ornatyldy
KÓKShETAÝ. QazAqparat - Kókshetaýda Qazaqstannyń qurmetti jýrnalısi, jazýshy, aqyn Máten Bıjanovtyń týǵanyna 80 jyl tolýyna oraı, qazaq baspasózi qaıratkeriniń turǵan úıinde eskertkish taqta ornatyldy, dep habarlaıdy QazAqparat tilshisi.
Saltanatty sharaǵa qalamgerdiń týǵan-týystary men jor-joldastary jáne úzeńgiles áriptesteri qatysty. Birinshi bolyp, aqyn-jazýshy, «Buqpa!» gazetiniń bas redaktory Tólegen Qajybaı, Zerendi aýdandyq gazetiniń burynǵy redaktory, tanymal partııa, baspasóz qaıratkeri, Máten aǵanyń ustazy Aıdarhan Temirbaev pen aýyldas zamandasy Balǵoja Ysmaıylov sóz alyp, jerles qalamger týraly salıqaly oı órbitti.
Saltanatty shara Maǵjan Jumabaev atyndaǵy Aqmola oblystyq ámbebap-ǵylymı kitaphanasynda «Aqparattyq-bıblıografııalyq bóliminde» qurylǵan «Altyn Arqa» aqparattyq-aǵartýshylyq ortalyǵy «Elim dep soqqan júregi...» atty eske alý keshine ulasty.
Eske sala keteıik, Máten Bıjanov 1937 jyly 11 qarashada Zerendi aýdanyna qarasty Qarabulaq aýylynda dúnıege kelgen. 1966 jyly Kókshetaý pedagogıkalyq ınstıtýtyn, 1978 KOKP Ortalyq komıteti janyndaǵy Máskeý qoǵamdyq ǵylymdar akademııasyn támamdaǵan. Eńbek jolyn Zerendi aýdandyq «Sotsıalıstik jol» gazetinde korrektor bolyp bastap, «Qyzyl tý», «Kókshetaý pravdasy» gazetterinde jumys istegen. Torǵaı oblystyq «Torǵaı tańy», Kókshetaý oblystyq «Kókshetaý» gazetterinde redaktor bolyp abyroıly qyzmet atqardy. 2001 jyldan óńirlik táýelsiz «Buqpa!» gazetiniń negizin qalap, uzaq jyldar bas redaktory boldy.
Birneshe pýblıtsıstıkalyq, jyr kitaptarynyń avtory. Sonymen qatar, Murad Adjıdiń «Qypshaqtar» kitabyn qazaq tiline aýdarǵan. Qazaqstan Respýblıkasy Táýelsizdiginiń 10 jyldyǵyna arnalǵan ádebı baıqaýdyń júldegeri. Jýrnalıstıka salasyndaǵy uzaq jylǵy jemisti qyzmeti úshin «Qurmet Belgisi» ordenimen, Qazaqstan Respýblıkasynyń «Mádenıet qaıratkeri» tósbelgisimen marapattalǵan.
