Kókshetaýda balamen kezdesý úshin páter jaldaǵan er adam áshkerelendi
ASTANA. KAZINFORM – Kókshetaýda «Jańa adamdar» qozǵalysynyń belsendileri kámeletke tolmaǵan qyzben kezdesýge árekettendi degen kúdikke ilingen er adamdy anyqtady.
Uıymnyń málimetinshe, balalardyń ınternettegi qaýipsizdigin tekserý maqsatynda belsendiler 12 jastaǵy qyzdyń jalǵan paraqshasyn ashqan.
Kóp uzamaı áleýmettik jeli qoldanýshylarynyń biri hat jazyp, áńgimeni orynsyz arnaǵa burǵan. Balanyń jasy birneshe ret aıtylǵanyna qaramastan, ol baılanysyn jalǵastyrǵan.
«Áleýetti pedofıl jynystyq sıpattaǵy materıaldardy jáne óziniń ıntımdik sýretterin jiberip, qyzdy da sondaı áreket jasaýǵa ıtermeleýge tyrysqan. Keıin kámeletke tolmaǵan balamen kezdesýdi josparlap, páter jaldaǵan», – delingen habarlamada.
Belgilengen orynǵa balanyń ornyna «Jańa adamdar» qozǵalysynyń belsendileri barǵan. Olardyń aıtýynsha, kúdikti retinde 2001 jyly týǵan Shansanhan Beıbarys anyqtalǵan.
«Balanyń senimin paıdalanýǵa tyrysatyn adamdar olardyń áreketi qoǵam nazarynan tys qalmaıtynyn túsinýi kerek», – dedi «Jańa adamdar» qozǵalysynyń ókili Jannur Bekturǵanova.
Uıym ókilderi jınalǵan barlyq materıaldar quqyqtyq baǵa berý úshin quqyq qorǵaý organdaryna tapsyrylǵanyn málimdedi.
«124 Azamattyq naýqany el boıynsha áleýetti qaýipterdi anyqtap, qoǵam nazaryn balalardyń qaýipsizdigi máselesine aýdarý jumysyn jalǵastyrady. Balany qorǵaý eresekterdiń qyraǵylyǵynan, tsıfrlyq ortadaǵy qaýipter týraly ashyq áńgimeden jáne alańdatarlyq belgilerge birden áreket etýden bastalady», – dedi Jannur Bekturǵanova.
Tergeý nátıjeleri boıynsha ǵana azamattyń is-áreketine quqyqtyq baǵa berilip, protsessýaldyq sheshim qabyldanady.
Aıta keteıik, pedofıldikke oqtalǵandarǵa qandaı jaza qarastyrylǵanyn mynaý silteme arqyly bile alasyz.
