Kókshetaýda balalar men jasóspirimder sherýi ótti
KÓKShETAÝ. QazAqparat - Kókshetaýda 1 maýsym - Halyqaralyq balalardy qorǵaý kúni sán-saltanatty sherýmen atalyp ótti, dep habarlaıdy QazAqparat tilshisi.
Bul kúni «Abylaı han» alańy ádettegiden erekshe nurlana tústi. Alań sábıler men balalardyń syńǵyrlaǵan kúmis kúlkisine toldy. Merekelik shara 3 jyl qatarynan balalar men jasóspirimder mýzykalyq ansambliniń sherýimen bastalyp júr. Bul joly da solaı boldy. Sherýge joǵary oqý oryndary stýdentteri, mektep jáne kolledj oqýshylary, mektepke deıingi mekemelerdiń tárbıelenýshileri, pedagogtar men balalar, jastar mýzykalyq ansamblderi jáne orkestr qatysty. Bıyl balalar men jasóspirimderdiń mýzykalyq ansambliniń sherýinde myńnan astam bala óner kórsetti.
Sharaǵa qatysqan Aqmola oblysy ákiminiń orynbasary Aına Mysyrəlimova balalar men olardyń ata-analaryn aımaq basshysy Ermek Marjyqpaevtyń atynan quttyqtady.
«Búgingi kúni óńirimizde 200 myńnan astam bala bar. Balalar men jasóspirimderdiń jan-jaqty sapaly bilim men tárbıe alýy úshin barlyq jaǵdaı jasalýda. Óńirde 615 mektepke deıingi bilim mekemesi jumys isteıdi. Oǵan 40 myńnan astam bala baryp júr. Orta bilimmen 120 myńnan astam bala qamtylǵan», - dedi Aına Mysyrəlimova quttyqtaý sózinde.
Merekelik shara qalanyń ortalyq saıabaǵynda jalǵasyn tapty. Onda balalarǵa arnalǵan túrli baıqaýlar men teatrlandyrylǵan kórinister, balalar ujymynyń merekelik sharasy uıymdastyryldy. Sondaı-aq, at, ponı, esekpen serýendegen balalardyń qýanyshynda shek bolmady. Ásirese, balalarǵa arnalǵan oıynshyq mashına, mototsıkl jáne attraktsıondarǵa otyrǵan búldirshinderdiń júzi bal-bul jaınap, shattyq qushaǵyna bólendi.
