Kókshetaýda balabaqsha kezeginde kimderge jeńildikter qarastyrylǵan
KÓKShETAÝ. QazAqparat - Kókshetaýlyqtarǵa balalaryn balabaqsha kezegine qoıýdyń erekshelikteri túsindirildi, dep habarlaıdy QazAqparat tilshisi Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmetine silteme jasap.
Kókshetaý qalalyq bilim bóliminiń mektepke deıingi mekemelerge balalardy ornalastyrý máseleleri boıynsha ádiskeri Álııa Ómirzaqovanyń aıtýynsha, qazirgi ýaqytta balabaqshaǵa ornalastyrý kezegi balanyń týǵan jyly boıynsha biryńǵaı qalalyq kezekke engizilgen. Kezektegi ótinimder kezekke qoıǵan kúni boıynsha retimen ornalasqan.
«Akmola.kz aqparattyq júıesi ótinim bildirýshilerge kezekke turýǵa, engizilgen ótinimderdi ózgertýge, memlekettik nemese jekemenshik balabaqshany tańdaýǵa múmkindik beredi» - deıdi Álııa Ómirzaqova.
Sonymen qatar, atalǵan júıede birqatar jeńildikter qarastyrylǵan. Jeńildigi bar azamattarǵa kezekten tys oryn alatyn, máselen, áskerı qyzmetshilerdiń balalaryn jatqyzýǵa bolady.
Budan bólek, birinshi kezektegi - zańdy ókilderi múgedek, ata-anasynyń qamqorlyǵynan aıyrylǵandar, jetimder, kópbalaly otbasydan shyqqan jáne erekshe bilim alýdy qajet etetin balalarǵa da jeńildik qarastyrylǵan.
«Ótinim bildirýshi kezektiń kelgeni jóninde eskertý alǵan soń balabaqshany tańdap, joldama alýy tıis. Eger úsh kún ishinde joldamany almasa, bul oryn barlyq kezektegi azamattar úshin qoljetimdi bolady. Biraq joldama almaǵan ótinim bildirýshi kezekte qala beredi» - deıdi Álııa Ómirzaqova.
Vedomstvonyń málimetinshe, ata-ana joldama alǵan soń 5 jumys kúni ishinde balabaqshaǵa kelmese, atalǵan joldama avtomatty túrde joıylyp, bala 10 jumys kúnine toqtatym-paraqqa jiberiledi. Toqtatym-paraqta turǵan ýaqyt ishinde basqa joldama alý múmkindigine shek qoıylady. Eger ótinim bildirýshi berilgen joldamanyń merzimin 2 ret jiberip alsa, onda bala avtomatty túrde kezekten shyǵarylady. Barlyq qosymsha suraqtar boıynsha qoldaý kórsetý qyzmetine habarlasýǵa bolady (87162252986).
