Kókshetaýda «Azat rýhtyń Abylaı hany» atty respýblıkalyq aqyndar aıtysy ótti
Kókshetaýda Respýblıka kúnine jáne uly memleket qaıratkeri, qolbasshy, dıplomat Abylaı hannyń 310 jyldyǵyna arnalǵan «Azat rýhtyń Abylaı hany» respýblıkalyq aqyndar aıtysy ótti, dep habarlaıdy Kazinform.
Ulttyq ónerdi nasıhattap, onyń damýyna memlekettik deńgeıde qoldaý kórsetý, sondaı-aq, talantty, daryndy jas aqyndardyń sheberligin shyńdaýǵa, kópshilikke tanylýyna múmkindik jasaýǵa baǵyttalǵan aıtysqa Astana qalasy jáne Qostanaı, Almaty, Soltústik Qazaqstan, Qyzylorda, Túrkistan, Aqmola oblystarynan sýyryp salma 12 aıtysker aqyn qatysyp, baq synady.
Aıtysty Aqmola oblystyq tarıhı-ólketaný mýzeıiniń dırektory, Jazýshylar odaǵynyń múshesi, aıtysker aqyn, QR Mádenıet salasynyń úzdigi Qudaıberli Myrzabek júrgizip otyrdy.
— Búgingi jyr dodamyz Respýblıka kúnine jáne Abylaı hannyń 310 jyldyǵyna arnalyp otyr. Mundaǵy basty mindet — Táýelsizdiktiń mańyzyn, saıası turaqtylyqty utqyr oımen jetkize bilý, sýyryp salyp, taban astynda taýyp aıtyp, sóz óneriniń injý-marjanyn tógildirý, daryndy aqyndardy qoldaý, — deıdi aıtysyń uıymdastyrýshysy Aqmola oblystyq halyq shyǵarmashylyq jáne mádenı demalys ortalyǵynyń dırektory Ashat Magavın.
Aqyndarynyń sheberligine Jazýshylar odaǵy Astana fılıalynyń dırektory, aqyn, halyqaralyq, respýblıkalyq aıtystardyń jeńimpazy Dáýletkereı Kápuly (qazylar alqasynyń tóraǵasy), aıtysker, jazýshy, tanymal aqyn Arman Berdalın, aqyn, jýrnalıst, Jazýshylar odaǵynyń múshesi Almas Temirbaı qazylyq etti.
Saıys qorytyndysy boıynsha Bas júldege aqmolalyq Erlan Dáýlet laıyq dep tanylyp, 1 mln teńgeniń aqshalaı sertıfıkatyna ıe boldy.
Al júldeli birinshi oryn jáne 800 myń teńgeniń aqshalaı sertıfıkatyna Qyzylorda oblysynan kelgen aqyn Muhtar Nııazov, ekinshi oryn jáne 500 myń teńgeniń aqshalaı sertıfıkatyna astanalyq Iranǵaıyp Kúzembaev, úshinshi oryn jáne 300 myń teńgeniń aqshalaı sertıfıkatyna taǵy bir aqmolalyq Qurmet Quralhan laıyq dep tanyldy.
Sonymen birge baıqaýǵa qatysqan ózge de aqyndar arnaıy dıplom jáne 100 myń teńgeniń aqshalaı sertıfıkatyn aldy.
Aıta ketsek, budan buryn Aqmola oblysynda Respýblıka kúnine oraı bir top kitaphanashy marapattalǵanyn jazǵan edik.
