Kókshetaýda azamattyq qoǵamdy damytýdaǵy blogosferanyń róli talqylandy
Sh.Ýálıhanov atyndaǵy Kókshetaý ýnıversıtetinde uıymdastyrylǵan sharaǵa magıstranttar, doktoranttar, oqytýshylar, ǵalymdar, JOO men ǴZI ǵylymı qyzmetkerleri qatysty.
«Qazirgi tańda áleýmettik jelilerdiń qoǵam ómirindegi orny erekshe. Órkenıetti qoǵam aqparat quraldarynyń, áleýmettik jelilerdiń damýymen jáne bostandyǵymen ólshenedi. Áleýmettik jeliler qazirgi órkenıetti elderdiń bárinde de úlken saıası kúsh bolyp sanalady. Memleket basshysy Qasym-Jomart Toqaev aıqyndap bergen «Halyq únine qulaq asatyn memleket» tujyrymdamasynyń basty maqsattarynyń biri de – qoǵamdyq sanany jańǵyrtyp, elimizde jańa saıası mádenıetti qalyptastyrý jáne ózara ornyqtyrý bolyp tabylady. Sonymen qatar, Prezıdent bastamasymen qurylǵan Ulttyq qoǵamdyq senim keńesi búgingi tańda halyq pen memleket arasyndaǵy altyn kópirge aınalyp, qoǵamnyń bılikke degen senimin arttyrýǵa yqpal etip otyr», - dedi konferentsııanyń ashylýynda sóz sóılegen Sh.Ýálıhanov atyndaǵy Kókshetaý ýnıversıtetiniń rektory Marat Syrlybaev.
Onlaın rejımde ótken konferentsııa barysynda fılosofııa, saıasattaný jáne dintaný ınstıtýtynyń dırektory Serik Seıdýmanov «Blogosferanyń vırtýaldy qoǵamynyń evolıýtsııasy», M. Qozybaev atyndaǵy Soltústik Qazaqstan ýnıversıtetiniń birinshi prorektory Erbol Isakaev, Ankara áleýmettik ǵylymdar ýnıversıtetiniń saıası ǵylymdar fakýlteti halyqaralyq qatynastar kafedrasynyń professory Merıem Hakım «Tsıfrlyq álem jáne Qazaqstan: memleketke, qoǵamǵa jáne jeke tulǵaǵa tónetin qaterler», QR Parlamenti Májilisiniń depýtaty Erlan Saırov «Elimizdiń qoǵamdyq damý úderisindegi áleýmettik jelilerdiń róli» taqyrybynda baıandama jasady.
«Sońǵy on jyl ishinde áleýmettik jeli búkil álem boıynsha, onyń ishinde bizdiń elimizde de qoǵamdyq, áleýmettik-saıası úrdisterdiń negizgi draıverine aınaldy. Sondaı-aq, áleýmettik jeli bılik pen halyqtyń arasynda keri baılanys ornatatyn mehnızm bolyp otyr. Búgingi kúni kóptegen adamdar osy blogosfera arqyly bılikpen baılanysqa shyǵýda. Bul elimizde kúnnen kúnge áleýmettik jeliniń bedeli artyp kele jatqandyǵyn bildiredi», - dedi Erlan Saırov.
Konferentsııada ózge de halyqaralyq deńgeıdegi ǵalymdar, qoǵam qaıratkerleri men saıasatkerlerdiń pikirleri tyńdaldy.
Osy rette, sharaǵa qatysýshylar elimizde blogerlik salany damytýǵa úles qosyp júrgen jáne Kókshetaýda «Azamattyq qoǵamdy damytýdaǵy blogosferanyń róli: bolmysy men bolashaǵy» taqyrybynda halyqaralyq ǵylymı-praktıkalyq konferentsııany uıymdastyrýǵa uıytqy bolǵan Sh.Ýalıhanov atyndaǵy Kókshetaý ýnıversıtetiniń prorektor Ǵalym Baıtúkke alǵys bildirdi.
