Kókshetaýda azamattyq forým ótti

KÓKShETAÝ. QazAqparat - Kókshetaýda «Qoǵam jáne memleket: 30 jyl seriktestik jáne damý #Birgemiz» atty 9-shy azamattyq forým ótti, dep habarlaıdy QazAqparat tilshisi.

Aqmola oblysy ákimi Ermek Marjyqpaevtyń qatysýymen ótken forým jumysyna QR Aqparat jáne qoǵamdyq damý mınıstrliginiń azamattyq ister jónindegi komıteti tóraǵasy Madııar Qojahmet, Qazaqstannyń azamattyq alıansynyń prezıdenti Baný Nurǵazıeva, azamattyq qoǵam ınstıtýttary, úkimettik emes jáne jastar uıymdary, kásipodaq jáne qoǵamdyq keńester, buqaralyq aqparat quraldary men memlekettik organdardyń ókilderi qatysty.

Forýmda aımaq basshysy Ermek Marjyqpaev quttyqtaý sóz sóılep, Memleket basshysy Qasym-Jomart Toqaevtyń bıylǵy Joldaýynda «memleket jáne qoǵam arasyndaǵy dıalog» máselesine erekshe toqtalǵandyǵyn aıtty.

«Memleket basshysy «memleket jáne qoǵam arasyndaǵy dıalog» máselesine úlken kóńil bólip otyr. Prezıdent Joldaýynda azamattardy tolǵandyratyn qazaqstandyq qoǵam ómiri máselesi aıtylǵan. Bul «Halyqtyń pikirine qulaq asatyn memleket» jasaýdaǵy basty baǵyt», - deı kele aımaq basshysy elimiz táýelsizdigin alǵannan beri ómirge kelgen osy qoǵamdyq ınstıtýttar men úkimettik emes uıymdardyń aıtylǵan mindetterdi júzege asyrý boıynsha atqaryp kele jatqan jumysyna oń baǵa berdi jáne onyń alda da izdenisti qadamdarǵa baryp, memlekettik organdarmen birlesip, el ıgiligi úshin jumys isteıtinine senim bildirdi.

Al, QR Aqparat jáne qoǵamdyq damý mınıstrliginiń azamattyq ister jónindegi komıtetiniń tóraǵasy Madııar Qojahmet, Qazaqstannyń azamattyq alıansynyń prezıdenti Baný Nurǵazıeva azamattyq qoǵamdy tıimdi damytýda úkimettik emes uıymdardyń ornyna toqtaldy.

«Búgingi tańda elimizde azamattyq qoǵam damý ústinde. Osy baǵytta memleket tarapynan zor kóńil bólinip keledi. Sondyqtan, bizderge úlken jaýapkershilik júktelip otyr», - dep atap ótti «Azamattyq Alıans» zańdy tulǵalar birlestiginiń tóraıymy Irına Terenteva.

Forýmnyń plenarlyq májilisinde «Shańyraq» áleýmettik – psıhologııalyq jáne zertteý ortalyǵy» qoǵamdyq qorynyń tóraǵasy M.Zakırov, «Shans» múgedekterdi beıimdeý ortalyǵy» qoǵamdyq birlestiginiń tóraǵasy V.Shımanskıı, qoǵamdyq monıtorıng úılestirýshisi O.Baımova qoǵamdyq uıymdardyń turǵyndarmen jumys tájirıbesi týraly sóz sóılep, óz oı-pikirleri men usynystaryn ortaǵa saldy.

Aıta ketý kerek, búgingi kúni Aqmola oblysynda 718 úkimettik emes uıym, onyń 22 fılıaly bar. Ókinishke oraı, 300-den astam uıym óz jumysyn toqtatqan. Bıylǵy jyly 298 qoǵamdyq uıym tirkelgen.

Forýmda birqatar úkimettik emes uıym men olardyń belsendi músheleri marapattaldy.

Budan keıin forýmnyń jumys qorytyndysy shyǵarylyp, Qazaqstannyń 9-shy Azamattyq forýmyna Aqmola oblysynan baratyn delegattardyń tizimi anyqtaldy.