Kókshetaýda azamattardy qabyldaýdyń biryńǵaı kúni ótti
100-den astam másele qaraldy, dep habarlaıdy QazAqparat Aqmola oblysy ákiminiń baspasóz qyzmetine silteme jasap.
Óńir basshysy men ártúrli qurylymdyq bólimshelerdiń jaýapty tulǵalary ótinish bildirýshilerdiń suraqtaryn jeke ózi tyńdap, jaýap berdi.
Stantsıonnyı kentinde turatyn Raıhan Turlybekova birden birneshe másele boıynsha – mádenıet úıin, meshit salý jáne kóshe jaryǵyn ornatý boıynsha ótinish bildirdi.
«Men Stantsıonnyı kentinde 30 jyl turdym. Biz jyl boıy mádenıet úıin salý máselesin kóterip kelemiz, ózim kitaphanashy bolyp jumys isteımin, ár túrli úıirmeler bar, kóptegen balalar bar, olarǵa oryn jetispeıdi, ózimizdiń mádenıet oshaǵymyz bolǵanyn qalaımyz», - dedi R.Turlybekova.
Óńir basshysy qala ákimdigine, mádenıet, energetıka jáne turǵyn úı-kommýnaldyq sharýashylyq basqarmalaryna tıisti tapsyrma berdi.
Qala turǵyndary arasynda eń ózekti máselelerdiń biri turǵyn úımen qamtamasyz etý boldy. Árbir jaǵdaı turǵyn úı zańnamasy sheńberinde jeke qaraldy.
Aıta keteıik, óńirde jalpy aýdany 114,8 myń sharshy metr 35 kóppáterli turǵyn úıdi, onyń ishinde 41,5 myń sharshy metrge 12 jalǵa beriletin úıdi iske qosý josparlanǵan.
Kommýnaldyq salada turǵyndar Saryarqa jáne Tsentralnyı shaǵyn aýdandaryndaǵy kóshelerdegi joldardy jóndeý, gazdandyrýdy qamtamasyz etý, abattandyrý suraýlarymen júgindi. Kókshetaý ákimdigine árbir máseleni egjeı-tegjeıli zerdelep, qysqa merzimde oryndaý tapsyryldy.
Qabyldaý barysynda kommýnaldyq qyzmetterdiń jumysy da atap ótildi.
«Men munda rahmet aıtý úshin keldim, ásirese TÚKSh bólimine. Ótken jyly Jaqsy dúkeninen Syrymbet dúkenine deıingi joldy jóndeýdi suradym. Bizge 30 jyl bolmaǵan trotýar da, jol da salyndy», - dedi zeınetker Kenjebek Kelisov.
Іs-shara úsh saǵattan astam ýaqytqa sozyldy, ol kóptegen máselelerdiń sheshimin tapty. Qosymsha qaraýdy qajet etetin máseleler baqylaýǵa alyndy.
«Birde-bir másele nazardan tys qalmaýy kerek. Barlyǵy qolda bar zańnamaǵa sáıkes sheshiletin bolady», - dep qorytyndylady Ermek Marjyqpaev.
