Kókshetaýda avtokólikterdi tirkeıtin HQKO ashyldy

Ashylý saltanatyna Aqmola oblysynyń ákimi Málik Myrzalın men memlekettik korporatsııanyń basqarma tóraǵasy Abylaıhan Ospanov qatysty, dep habarlaıdy «Azamattarǵa arnalǵan úkimet» memlekettik korporatsııasy» KEAQ baspasóz qyzmeti.
 

Ospanovtyń aıtýynsha, bul Qazaqstandaǵy on úshinshi mamandandyrylǵan halyqqa qyzmet kórsetý ortalyǵy. «Respýblıka boıynsha on eki mamandandyrylǵan HQKO arqyly júrgizýshilerge shamamen 1 700 000 qyzmet kórsetildi. Endi kókshetaýlyqtar da avtokólikti jyldam jáne ońaı tirkeý múmkindigine qol jetkizdi», - dedi Abylaıhan Ospanov.

  Eki gektardan astam ýchaskeni alyp jatqan jańa mamandandyrylǵan HQKO Sh.Ýálıhanov kóshesi, 1/3 mekenjaıynda (Zerendi tasjolyna shyǵar jolda) ornalasqan. Endi qyzmet alýshylar óz ýaqyttaryn únemdep, nebári eki saǵattyń ishinde kólikti tirkep, júrgizýshi kýáligin ala alady. Bıznes-protsestiń barlyǵy avtomattandyrylǵan jáne memlekettik organdardyń aqparattyq júıesine qosylǵan. Avtomatty avtodromda kólikti júrgizý boıynsha tájirıbelik emtıhan tapsyrý kezinde qoldanylatyn zamanaýı elektrondyq baqylaý júıesi bul úrdiske adamı faktordy qatystyrmaýǵa múmkindik beredi. Komıssııa tekserisinen de osy ǵımarattan shyqpaı-aq ótýge bolady. Barlyq dárigerler, sonyń ishinde psıhıatr men narkolog úshin arnaıy kabınetter qarastyrylǵan.  Aýmaqta kólikti tehnıkalyq tekseristen ótkizetin arnaıy angar da bar.
 

   Mamandandyrylǵan HQKO dúısenbi-senbi aralyǵynda saǵat 9:00-den 20.00-ge deıin jumys isteıdi. Sondaı-aq, qyzmet kórsetý sapasyn onlaın tártipte qadaǵalaý úshin ǵımaratta ornatylǵan 23 vıdeobaqylaý kamerasy «Azamattarǵa arnalǵan úkimettiń» ahýal ortalyǵyna qosylǵan.

  Aıta ketý kerek, aldaǵy kúnderi memlekettik korporatsııa Semeı qalasynda, al kelesi jyldyń birinshi toqsanynda Atyraý jáne Oral qalalarynda da osyndaı mamandandyrylǵan HQKO ashady. Nátıjesinde, 2018 jyly Qazaqstannyń barlyq aýmaǵyndaǵy avtokólik ıeleri memlekettik qyzmetterdi mamandandyrylǵan halyqqa qyzmet kórsetý ortalyqtarynan ala alady.