Kókshetaýda avtokólik aınasyn urlaǵan kúdikti qolǵa tústi
KÓKShETAÝ. QazAqparat - Kókshetaý polıtseıleri beınebaqylaý kamerasy arqyly «Volkswagen Passat» avtokóliginiń aınasyn urlap bara jatqan kúdiktini qolǵa túsirdi, dep habarlaıdy QazAqparat tilshisi ІІD baspasóz qyzmetine silteme jasap.
Polıtseılerdiń deregi boıynsha tamyzdyń 6-sy kúni Kókshetaý qalasynyń ІІB JBO beınebaqylaý ınspektory túngi saǵat 01:00 kezinde qalanyń ortalyq kóshesimen qolynda kúdikti zat ustap bara jatqan er adamdy baıqap qalǵan. Keıin sol aýmaqqa ІІB JPQ jol patrýldik polıtsııa batalonynyń ekıpajy baǵyttalady.
"Kúdiktiniń qolyndaǵy zatty tekserý kezinde eki AKB-60 avtokólik aınasy men avtomagnıtolla ekeni anyqtaldy. Keıin ony kúdikti úı aýlalarynyń birinde turǵan «Volkswagen Passat» avtokóliginen urlap alǵany belgili boldy.
Arada birneshe saǵat ótken soń kólik ıesi de Kókshetaý qalasynyń ІІB kezekshilik bólimine habarlasyp, kólik aınasy men avtomagnıtollasynyń qoldy bolǵanyn aıtyp shaǵymdandy. Kólik ıesine keltirilgen shyǵyn kólemi 100 myń teńgeni qurady", dep túsindirdi baspasóz qyzmetindegiler.
Qazirgi kezde osy oqıǵaǵa baılanysty QR QK 188-babynyń 2-bóligi boıynsha is qozǵalyp, sotqa deıingi tergeý amaldary júrgizilýde.
Aıta ketý kerek, jyl basynan beri óńirde beınebaqylaý kamerasynyń kómegimen 72 qylmystyń beti ashylǵan. Al arnaıy «102» telefon nómirine 79688 aqparat túsken.
