Kókshetaýda avtobýs pen avtomobıl soqtyǵysty, zardap shekkender bar
KÓKShETAÝ. QazAqparat - Kókshetaýda avtobýs pen avtomobıl soqtyǵysyp, alty adam aýrýhanaǵa jetkizildi, dep habarlaıdy QazAqparat tilshisi.
Aqmola oblystyq polıtsııa departamenti baspasóz qyzmetiniń málimdeýinshe, 5 shilde kúni 14:00-de Kókshetaýdaǵy N. Nazarbaev dańǵyly men Áýelbekov kóshesiniń qıylysynda jol apaty bolǵan.
«№1 baǵdaryndaǵy «PAZ» markaly avtobýs Áýelbekov kóshesimen kele jatyp, N.Nazarbaev kóshesine burylarda, Áýelbekov kóshesimen kele jatqan Toyota Camry avtomobıline jol bermegen. Sonyń saldarynan ekeýi soqtyǵysqan», - delingen habarlamada.
Oqys oqıǵa saldarynan avtobýstyń ishindegi úsh jolaýshy, avtomobıldiń taǵy úsh jolaýshysy - jalpy alty adam zardap shegip, Aqmola oblystyq aýrýhanasyna jetkizilgen.
«Qazir osy jol oqıǵasy boıynsha tekseris júrip jatyr, sot-medıtsınalyq saraptamalar belgilengen», - deıdi polıtseıler.
Avtor: Oksana Matasova
