Kókshetaýda aýyryp, dárigerge júgingen 69 jastaǵy keıýanadan koronavırýs tabyldy
KÓKShETAÝ. QazAqparat - Aqmola oblysynda koronavırýs ınfektsııasyn juqtyrýdyń taǵy 1 jaǵdaıy tirkeldi, dep habarlaıdy QazAqparat tilshisi oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentine silteme jasap.
Vedomstvonyń málimetinshe, bul joly koronavırýs Kókshetaý qalasynyń turǵynynan tabylǵan.
«1951 jylǵy zeınetker ózi boıynda vırýstyń aıqyn belgilerin baıqap, dárigerlerge júgingen. Endi ol Kókshetaý qalasyndaǵy Aqmola oblystyq týberkýlezge qarsy dıspanseriniń stantsıonarynda emdeledi» deıdi vedomstvodan.
Aqmola oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentiniń qyzmetkerleri atap ótkendeı, naýqastyń úı oshaǵynda epıdemııaǵa qarsy is-sharalar qolǵa alynýda. Naýqastarmen baılanysta bolǵan adamdardy anyqtaý boıynsha sanıtarlyq-epıdemıologııalyq sharalar júrgizilýde. Sondaı-aq, dezınfektsııa jasaldy.
Aıta keteıik, Aqmola oblysynda koronavırýs juqtyrýdyń 177 jaǵdaıy tirkelgen bolsa, Kókshetaý qalasynda 5 adamda indet bar.
Oblys boıynsha koronavırýs ınfektsııasyn juqtyrǵan óńirlerdiń arasynda Kókshetaý qalasy, Aqkól, Arshaly, Astrahan, Egindikól, Ereımentaý, Esil, Qorǵaljyn jáne Shortandy aýdandary bar.
