Kókshetaýda aýyl sharýashylyǵy ónimderiniń jármeńkesi ótip jatyr
KÓKShETAÝ. QazAqparat - Kókshetaý qalasynyń «Táýelsizdik» alańynda óńirdiń aýyl sharýashylyǵy taýar óndirýshilerdiń qatysýymen azyq-túlik jármeńkesi ótip jatyr, dep habarlaıdy QazAqparat tilshisi.
Jármeńkege Astrahan, Atbasar, Birjan sal, Bulandy, Esil, Jaqsy, Jarqaıyń. Zerendi, Sandyqtaý aýdandary men Kókshetaý qalasynyń aýyl sharýashylyǵy taýar óndirýshileri jáne «Kókshe» áleýmettik kásipkerlik korporatsııasy» AQ-y qatysyp otyr.
«Bul jolǵy jármeńkege óńirdiń 90-nan astam aýyl sharýashylyǵy taýar óndirýshileri jalpy quny 55,6 mıllıon teńge bolatyn 83 tonnaǵa jýyq ónim ákeldi. Qala turǵyndary men qonaqtary jergilikti óndirýshilerden azyq-túliktiń 30-dan astam túrin naryq baǵasynan 10-15 paıyz arzanǵa satyp alýda. Sonyń ishinde 23 tonna et jáne shujyq ónimi, 4 tonna balyq, 6,4 tonna sút jáne sút ónimi, 11 tonnadan astam un, 5 tonna ósimdik maıy, 33,5 tonna kartop pen kókónis jáne ózge de ónimder bar», - dedi aýyl sharýashylyǵy basqarmasynyń basshysy Dımash Talasbaev.
Aýyl sharýashylyǵy ónimderinen bólek, jemis aǵashtary men buta tuqymdarynyń kóshetteri, otyn, shóp, astyq qaldyqtary da satylymǵa shyǵarylyp otyr.
Jármekeniniń uıymdastyrylýyn arnaıy baryp kórgen aımaq basshysy Ermek Marjyqpaev azyq-túlik baǵasy men sapasyna nazar aýdardy.
Kásiporyndar barlyq sanıtarlyq-epıdemıologııalyq standarttarǵa saı jumys isteýde. Ár pavılonda antıseptık bar jáne satýshylar taýarlardy jeke qorǵanys quraldaryn qoldana otyryp satýda.
