Kókshetaýda aýtızmi bar 30-dan astam bala arnaıy mektep-ınternatta oqıdy
KÓKShETAÝ. QazAqparat - Kókshetaýdaǵy №1 oblystyq arnaıy túzetý mektep-ınternatynda Irına Kostıtsynanyń jetekshiligimen damýynda erekshelikteri bar balalardyń ata-analarynan qurylǵan «Jańa álem» bastamashyl toby búkilálemdik aýtızm máselesi týraly aqparatty taratý kúnine oraı oıyn-saýyq is-sharasyn ótkizdi, dep habarlaıdy QazAqparat tilshisi Aqmola oblysynyń ishki saıasat basqarmasy baspasóz qyzmetine silteme jasap.
Atalǵan sharanyń baǵdarlamasynda balalar týyndylarynyń kórmesi, «Áke, anam, men ...» baıqaýy, anımatorlarmen qımyl-qozǵalys oıyndary, sazdy shoý, sabyn kópirshikteri oıyndary ótkizildi.
№1 Oblystyq arnaıy túzetý mektep-ınternatynyń dırektory Olga Býrdınskaıanyń aıtýynsha, búgingi tańda mektepte 286 bala oqıdy, onyń otyzdan astamy aýtızm dıagnozymen. Mundaǵy oqytýshylar defektolog mamandar, olar balalarmen jumys jasaýda únemi túrli ádisterdi qoldanýǵa tyrysady.
Aıta ketý kerek, bastamashyl toptyń qatysýshylary aýtızm belgisi bar balalardyń otbasylaryn qoǵamdyq oryndarda kezdestirgen jaǵdaıda óz-ózin qalaı ustaý kerektigin halyqqa habardar etý úshin paraqshalar, aqparat posterlerin basyp shyǵaryp, saýda ortalyqtarynda, emhanalarda, balalar saýyqtyrý ortalyqtarynda ilip qoıǵan.
Іs-sharaǵa Aqmola oblysynyń ishki saıasat basqarmasy basshysynyń orynbasary Vıktor Molodovskıı, ınklıýzıvti bilim berýdi damytý jónindegi úılestirý keńesiniń tóraǵasy Marat Ibraev, bilim basqarmasynyń, buqaralyq aqparat quraldarynyń ókilderi, Aqmola oblysynyń isker áıelder qaýymdastyǵy, Sh.Ýálıhanov atyndaǵy KMÝ stýdentteri qatysty.
Sonymen qatar, «Táýelsizdik» alańynda jastar uıymdarynyń ókilderi, atap aıtqanda, «Dýman» pedagogıkalyq quramy, eriktiler, «Drım» birikken tárbıeshiler odaǵy jáne oblystyq «ıÝnost» pedagogıkalyq quramynyń uıymdastyrýymen aspanǵa kók tústi sharlardy ushyrdy.
