Kókshetaýda atlet 112 keli girdi tisimen kóterip, álem rekordyn beıresmı jańartty

KÓKShETAÝ. QazAqparat - Kókshetaýda qazaqtyń aty ańyzǵa aınalǵan palýany, birneshe dúrkin álem chempıony Qajymuqan Muńaıtpasovtyń rýhyna arnalǵan qazaq kúresinen oblystyq chempıonat ótti, dep habarlaıdy QazAqparat tilshisi.

Osynaý jarys aıasynda ataqty atlet Tımýr Spataev jalpy salmaǵy 112 keli girdi tisimen kóterip, álem rekordynan joǵary nátıje kórsetti.

Oblystyq dene shynyqtyrý jáne sport basqarmasy baspasóz qyzmetiniń málimetinshe, chempıonatta oblystyń ár óńirinen jınalǵan 200-ge jýyq palýan 23 salmaq dárejesi boıynsha boz kilemde kúsh synasqan.

Jarysqa qonaq retinde Qajymuqan Muńaıtpasovtyń týystary qatysty.

Qonaqtar arasynda Frantsııa, Germanııa, Reseı, Ózbekstandaǵy chempıonattarda birneshe ret júldeli oryndardy ıelengen, Gınnestiń rekordtar kitabyna engen ataqty sportshy, armrestlıng jáne qoıan-qoltyq urystan halyqaralyq dárejedegi sport sheberi Tımýr Spataev ta boldy.

«Ol jalpy salmaǵy 112 keli girdi tisimen kóterip, beıresmı túrde álemdik rekordty jańartty. Tımýr óziniń erekshe trıýkin qazaqtyń uly palýany jáne batyr Qajymuqan Muńaıtpasovtyń 151 jyldyǵyna arnady», - dedi vedomstvodan.