Kókshetaýda astanalyq neırohırýrgter mı qantamyrlaryna ota jasady
KÓKShETAÝ. QazAqparat - Aqmola oblystyq aýrýhanasynda Astanadan kelgen neırohırýrgter sheberlik synybyn ótkizdi, dep habarlaıdy QazAqparat tilshisi.
Sheberlik synyby barysynda Astanadaǵy neırohırýrgııa ǵylymı ortalyǵynyń fýnktsıonaldy neırohırýrgııa jəne qan tamyrlary bólimshesiniń dáriger-neırohırýrgi Asylbek Qalıev mıdyń endovaskýlıarli embolızatsııa anevrızmi boıynsha 5 ota jasady. Alǵashqy kúni ınsýlt ortalyǵyna túsken 4 adamnyń basyndaǵy qandy toqtatý boıynsha kúrdeli ota jasasa, kelesi kúni 17 jastaǵy naýqas jetkizildi.
Bulandy aýdanynan jetkizilgen naýqasty kórgen dáriger «boıjetkenniń basy aman, qatty qulaǵannan esinen tanyp qaldy» degen sheshimge keldi.
Asylbek Qalıevtiń aıtýynsha, budan bylaı neırohırýrgter zamanaýı tehnologııa boıynsha endovaskýlıarlyq ádispen adamnyń bas súıegin burynǵydaı ashpaı-aq, pyshaqsyz ota jasaı beretin bolady.
«Bul ádispen adamnyń mı qantamyrlaryna ota jasaý úshin bir kishkene tesik qana jetkilikti. Sol arqyly arnaıy quraldar engizilip, basta paıda bolǵan arterıaldy anevrızm jabylady. Bul keıin naýqastyń tez saýyǵyp ketýine de oń áserin tıgizedi», - deıdi Asylbek Qalıev.
