Kókshetaýda áskerı kolledjdiń 36 kýrsanty em qabyldap jatyr

ASTANA. KAZINFORM – Aqmola oblysynyń densaýlyq saqtaý basqarmasy QR Qorǵanys mınıstrliginiń Shoqan Ýálıhanov atyndaǵy Áskerı kolledji kýrsanttarynyń densaýlyq jaǵdaıyna qatysty sońǵy málimetti jarııalady.

3 aqpandaǵy jaǵdaı boıynsha Kókshetaý qalasyndaǵy Juqpaly aýrýlar ortalyǵynan 25 kadet shyǵaryldy. Qazirgi ýaqytta ortalyqta barlyǵy 36 adam em qabyldap jatyr, onyń 35-i – balalar, bireýi – eresek adam.

– Aýyr jaǵdaıdaǵy naýqastar joq. 9 balanyń jaǵdaıy ortasha aýyr dep baǵalanyp otyr, qalǵan 27 kýrsanttyń jaǵdaıy qanaǵattanarlyq, – dep málimdedi vedomstvodan.

Vedomstvo dereginshe, indet bastalǵaly beri barlyǵy 46 kadet aýrýhanadan shyǵarylǵan. Áskerı kolledjdiń provızorlyq ızolıatorynda 46 kýrsant karantınde jatyr. Barlyǵy medıtsına qyzmetkerleriniń baqylaýynda.

– Emdeý tolyq kólemde júrgizilip jatyr, aýrýhanaǵa jatqyzylǵandardyń ómirine qaýip joq, – dep atap ótti basqarma ókilderi.

Eske salaıyq, bastapqyda Şýchınsk qalasyndaǵy áskerı kolledjde 60-tan astam kadettiń qyzylsha juqtyrǵany habarlanǵan bolatyn.

Keıin oblystyq densaýlyq saqtaý basqarmasynyń málimetinshe, aýrýhanaǵa jatqyzylǵan kadetter sany 71-ge jetip, olardyń 24-inde qyzylsha zerthanalyq jolmen rastalǵan.